Divššo Kela-áššiid áiggil ortnegii ovdal juovllaid – basit váikkuhit doarjagiid máksimii
Kela-áššiid gánneha dikšut áiggil ortnegii ovdal juovllaid, dasgo basit váikkuhit ovdduid máksinbeivviide, ja jahkemolsašupmi lea Kelas hohpolaš áigi.
Áigáiboahtindoarjja geargá kontui ovdal juovllaid, jos ohcamuš ja mildosat leat doaimmahuvvon maŋimustá 11.12. Juovllat áradit maiddái bargguhisvuođaáigge almmuhan- ja máksinbeivviid. Juovlabasiid ja ođđajagebeaivve Kela bálvalanbáikkit ja telefonbálvalus leat gitta. Lassin jahkemolsašupmi ja jagi vuosttas vahkut leat Kelas máŋgii hohpolaččat.
Oza áigáiboahtindoarjaga áiggil
Juovlamánus áigáiboahtindoarjaga maŋimuš máksinbeaivi ovdal juovllaid lea 22.12. Doarjja geargá dalle kontui, jos ohcamuš ja dárbbašlaš mildosat leat doaimmahuvvon Kelai maŋimustá 11.12.
Jos áššehas dárbbaša áigáiboahtindoarjaga hohpolaččat, son galgá váldit oktavuođa Kela bálvalanbáikái dahje bálvalannummirii 020 692 207. Hohpolaš dilli sáhttá leat ovdamearkan akuhta dárbu máksočatnasupmái dálkasiid dahje borramušgálvvuid várás.
Jos áššehas dárbbaša áigáiboahtindoarjaga hohpolaččat Kela rabasáiggiid olggobealde, gielda sáhttá vihkkedallama mielde mieđihit eastadeaddji áigáiboahtindoarjaga. Akuhta kriisadilis juovlabasiid áigge áššehas sáhttá leat oktavuođas iežas ássangieldda sosiálagohcimii.
Almmut bargguhisvuođabeivviid áiggil
Juovllat áradit bargguhisvuođaáigge almmuhan- ja máksinbeivviid. Oainnát OmaKelas dahje du oažžun almmuhanskovis beaivvi, goas sáhtát guođđit iežat almmuhusa.
Jos bargguhisvuođaáigge almmuhusa áigodat nohká 20.12.2023 dahje 21.12.2023
- almmuhusa sáhtát máhcahit 20.12.2023
- ruđat leat konttus áramustá 22.12.2023.
Juos bargguhisvuođaáigge almmuhusa áigodat nohká 22.12.2023, 23.12.2023 dahje 24.12.2023
- almmuhusa sáhtát máhcahit 21.12.2023
- ruđat leat konttus áramustá 27.12.2023.
Juos bargguhisvuođaáigge almmuhusa áigodat nohká 25.12.2023
- almmuhusa sáhtát máhcahit 22.12.2023
- ruđat leat konttus áramustá 28.12.2023.
Almmuhusa gánneha doaimmahit OmaKelas juo máhcahanbeaivve iđida, vuoi dat gergo gieđahallot nu jođánit go vejolaš.
Telefonbálvalus lea rabas juovllaid ja ođđajagi gaskkas
Suomagielat telefonbálvalus lea juovllaid ja ođđajage gaskasaš vahku áigge rabas gas–bea dmu 9–16.
Davvisámegielat telefonbálvalus bálvala árgan dmu 9–11 nummiris 020 634 2894. Bálvalus lea gaskaboddasaččat gitta 11.–26.12.2023. Sáhtát sáddet rávdnjepoastta čujuhussii saame@kela.fi ja bivddát, ahte dutnje váldojuvvo oktavuohta. Kela sámegielat bargi dahje dulka, man Kela ordne, riŋge dutnje ja soahpá áššiid doaimmaheamis.
Bálvalanbáikkiid rabasáiggiin sáhttet leat nuppástusat juovllaid ja ođđajage gaskkas ja ođđajage maŋŋá. Rabasáiggiid ja čujuhusaid gánneha dárkkistit kela.fis. Anára bálvalanbáiki (Avvilis) lea rabas gaskavahkuid dmu 10–12 ja dmu 13–15.
Mii sávvat iežamet áššehasaide ráfálaš juovllaid ja lihkolaš ođđa jagi 2024!