Bovdehus webinárii: Perspektiivvat sámiid vuoigatvuođaide virgeoapmahašbálvalusain
Virgeoapmahaččat ja eará almmoshálddahusa doaibmit leat maŋimuš jagiid aktiivvalaččat ovddidan bálvalusaid maiddái sámegielat olbmuide. Masa sámegielat bálvalusaid ovddideapmi vuodduduvvá? Maid láhkaásaheapmi eaktuda virgeoapmahaččain ja almmolaš doaibmiin? Naba masa sápmelaš áššehasain lea vuoigatvuohta? Dáid gažaldagaide mii ohcat ovttas vástádusaid sámedikki, vuoigatvuođaministeriija ja Kela ordnen Perspektiivvat sámiid vuoigatvuođaide virgeoapmahašbálvalusain -webináris.
Webinára hállin leat ráđđehusčálli Pamela Sarasmo vuoigatvuođaministeriijas ja gielladorvočálli Anne-Kirste Aikio sámedikkis. Webinára rahpá spesiálaplánejeaddji Lahja Johansen-Lampsijärvi Kelas.
Webinár lea dárkkuhuvvon virgeoapmahaččaide ja eará almmoshálddahusa doaibmiide sihke goalmmát sektora doaibmiide dego servviide. Webinára giella lea suomagiella.
Webinára mihttomearrin lea
- lasihit áddejumi sámiid gielalaš, sosiálalaš ja kultuvrralaš vuoigatvuođain almmoshálddahusa bálvalusain
- bohciidahttit jurdagiid das, mat leat almmoshálddahusa geatnegasvuođat ja mo dat ollašuvvet iežas organisašuvnnas.
Webinárii ii dárbbaš almmuhit.
Áigi: maŋ 29.10.2024 dmu 9.00–10.00
Báiki: Teams
Dilálašvuohta báddejuvvo. Liŋka báddemii gávdno dilálašvuođa maŋŋá sámedikki siidduin Saamelaisten kielelliset oikeudet (Sámiid gielalaš vuoigatvuođat, samediggi.fi).
Buresboahtin!