Beassážat rievdadit Kela bálvalusaid ja mávssuid áigetávvaliid

Beassážat áradit bargguhisvuođaáigge almmuhanbeivviid ja bargguhisvuođadoarjaga máksinbeivviid. Áigáiboahtodoarjja geargá kontui ovdal beassážiid, jos ohcamuš ja čuvvosat leat doaimmahuvvon Kelai maŋimustá 4.4.2025. Skilleduorastaga Kela bálvala áššehasaid dmu 13 rádjai, ja áigáiboahtodoarjaga gohcin lea rabas dmu 16 rádjai.

Beassážat áradit bargguhisvuođaáigge almmuhanbeivviid ja bargguhisvuođadoarjaga máksinbeivviid.

Jos bargguhisvuođaáigge almmuhusa áigodat nohká 15.–16.4.2025 

• almmuhusa sáhttá máhcahit 15.4.2025
• ruđat leat konttus áramustá 17.4.2025.

Jos bargguhisvuođaáigge almmuhusa áigodat nohká 17.4.2025

• almmuhusa sáhttá máhcahit 16.4.2025
• ruđat leat konttus áramustá 22.4.2025.

Jos bargguhisvuođaáigge almmuhusa áigodat nohká 18.–20.4.2025

• almmuhusa sáhttá máhcahit 17.4.2025
• ruđat leat konttus áramustá 23.4.2025.

Almmuhusa gánneha doaimmahit MuKelas jo máhcahanbeaivve iđida, vai dat gergo gieđahallot nu jođánit go vejolaš.

Beassážiid váikkuhus áigáiboahtodoarjaga ohcamii

Áigáiboahtodoarjaga maŋimuš máksinbeaivi ovdal beassážiid lea duorastaga 17.4.2025. Doarjja geargá dalle kontui, jos ohcamuš ja buot dárbbašlaš čuvvosat leat doaimmahuvvon Kelai maŋimustá 4.4.2025.

Skilleduorastaga Kelas lea hohpolaš áigáiboahtodoarjaga dárbbašeaddjiide gohcin telefonbálvalusas ja muhtin bálvalanbáikkiin dmu 16 rádjai. Hohpolaš dilli sáhttá leat ovdamearkan dat, ahte áššehas dárbbaša johtilit máksinčatnasumi dálkasiidda dahje borramušgálvvuide.

Jos áššehas dárbbaša áigáiboahtodoarjaga hohpolaččat Kela rabasáiggiid olggobealde, buresveadjinguovlu sáhttá guorahallama mielde mieđihit eastadeaddji áigáiboahtodoarjaga. Akuhta kriisadilis basiid áigge áššehas sáhttá leat oktavuođas buresveadjinguovllu sosiálagohcimii.

Áššehasbálvalusa rabasáiggit beassážiid

Kela telefonbálvalus lea skilleduorastaga 17.4.2025 rabas dmu 9–13, muhto áigáiboahtodoarjaga bálvalannummirii 020 692 207 sáhttá hohpolaš dáhpáhusain riŋget dmu 16 rádjai. Gávnnat Kela bálvalannummiriid neahtas čujuhusas www.kela.fi/soita-kelaan (suomagillii).

Davvisámegielat telefonbálvalanlinnjá lea doaisttážii gitta. Jos dárbbašat bálvaleami sámegillii, sáhtát guođđit midjiide oktavuođaváldinbivdaga čujuhussii saame@kela.fi. Čále oktavuođaváldinbivdagii iežat nama ja telefonnummira ja muital, mainna sámegielain háliidat dikšut áššiid. Mii leat dutnje oktavuođas nu jođánit go vejolaš.  

Kela telefonbálvalussii sáhttá dál čálihit sisa ovddalgihtii MuKela bokte. Sisačáliheapmi jođálmahttá áššiiddikšuma, go Kela áššedovdi oaidná áššehasdieđuid dalán go vástida riŋgemii. Kelai sáhttá riŋget maiddái almmá sisačáliheami, goas áššehas identifiserejuvvo riŋgema áigge eará láhkai.

Skilleduorastat váikkuha maiddái rabas bálvalanbáikkiid rabasáiggiide. Rabas bálvalanbáikkit mannet gitta maŋimustá dmu 13, muhto oassi báikkiin gohcá hohpolaš áigáiboahtodoarjaga dárbbašeaddjiid dihte dmu 16 rádjai. Hohpolaš áigáiboahtodoarjaga geažil gohcet čuovvovaš bálvalanbáikkit:

• Helsset/Kamppi
• Hämeenlinna
• Joensuu
• Jyväskylä
• Kajaani
• Kokkola
• Kotka
• Kuopio
• Lahti
• Lappeenranta
• Oulu
• Pori
• Roavvenjárga
• Seinäjoki
• Tampere
• Turku
• Vaasa.

Dárkkis bálvalanbáikkiid čujuhusaid bálvalanbáikeozus čujuhusas www.kela.fi/palvelupisteen-haku (suomagillii).

Kela telefonbálvalus ja bálvalanbáikkit leat gitta

• guhkesbearjadaga 18.4.2025
• beassášlávvardaga 19.4.2025
• 1. beassášbeaivve 20.4.2025
• 2. beassášbeaivve 21.4.2025.

Kela persovdnaáššehasaide oaivvilduvvon áššiiddikšunbálvalusas elege MuKelas sáhttá ohcat ovdduid, sáddet čuvvosiid ja almmuhit nuppástusain man beare beaivve birra jándora. MuKelas sáhttá maiddái dárkkistit iežas ohcamuša dili ja ovdduid máksinbeivviid. MuKelai čálihuvvo sisa neahttabáŋkodovddaldagaiguin, mobiilasihkkarastimiin dahje sihkkarastinkoarttain.

Rávvagiid Kela-áššiide sáhttá jearrat maiddái chatrobohtas, mii bálvala kela.fi-siidduin birra jándora. Chatrobohtas oažžu johtilit ja álkit veahki doarjagiid ohcama buot muttuide suomagillii ja ruoŧagillii. Chatrobohtta veahkeha maiddái MuKelas vánhemiidbeaiveruđa dahje áigáiboahtodoarjaga ohcci olbmuid.

Beassážiid spiehkastatáiggit oktasašbargoguimmiide

Skilleduorastaga 17.4.2025 Kela bálvala oktasašbargoguimmiid dmu 13 rádjai. Doaktárlinnjá lea goittotge skilleduorastaga gitta. Áigáiboahtodoarjaga bargoguimmiid bálvalit skilleduorastaga dmu 9–12 ja hohpolaš áigáiboahtodoarjaga áššehasoktavuođain gitta dmu 16 rádjai.

Buot bálvalannummirat guimmiide leat gitta 18.4.–21.4.2025.