Kela muitala fápmudeamis máŋggain gielain

Jos áššehas ii sáhte ieš dikšut Kela-áššiidis, son sáhttá fápmudit bargui nuppi olbmo. Kela ođđa ráva muitala máŋggain sierra gielain, maid fápmudeapmi oaivvilda ja mo dan bargat.

Kela-áššiid ii leat bággu dikšut ieš, muhto jos lea dárbu gii nu eará sáhttá dikšut daid áššehasa beales: ovdamearkka dihte beallelaš, vánhen, mánná dahje ustit. Fápmudeapmái laktáseaddji detáljaid ádden sáhttá leat váttis ovdamearkka dihte giellamuvrra dihte dahje danin, ahte fápmudeapmi lea doaban amas. Kela ođđa ráva čielggasmahttá 14 sierra gielain dan, maid fápmudeapmi oaivvilda ja geasa dan sáhttá bargat.

Kela háliida ođđa rávvagiin sihkkarastit, ahte maiddái easkka riikii fárren áššehas ádde vuoigatvuođaidis iehčanas doaibmin.

– Áššehasbálvalusas lea boahtán ovdii dilálašvuođat, main lea loktanan fuolla áššehasa vuoigatvuođadorvvu ollašuvvamis ja suopmelaš servodaga dásseveardásaš doaibmama áddemis. Ođđa rávvaga vehkiin lea ulbmilin veahkehit áššehasa áddet, maid fápmudeapmi oaivvilda. Ráva muitala čielgasit maiddái dan, geasa váldegirjji sáhttá addit ja maid áššiid nuppi olbmo beales sáhttá dikšut, ovddideami áššedovdi Päivi Nyberg áššehasvuođaovttadagas dadjá.

Kela movttiidahttá girjjálaš fápmudeapmái

Fápmudusa sáhttá addit maiddái njálmmálaččat, muhto dat doaibmá dušše oktii. Girjjálaš fápmudus fas lea fámus doaisttážii. Kela movttiidahttá girjjálaš fápmudeapmái, daningo girjjálaš váldegirji, mii gávdno áššehasa dieđuin álkidahttá sihke áššehasa ja su fápmudan olbmo áššiid dikšuma. Seammás dat čielggasmahttá maiddái Kela áššedovdiid bargama. 

Kelas lea gárvves váldegirjeskovvi Váldegirji – Ovdoáššiid dikšun Kelas (VAL 3sme, pdf) fápmudusa addimii.

Áššehas mearrida ieš, maid áššiid váldegirjjiin sáhttá dikšut. Nuppi olbmui sáhttá addit lobi dikšut buot ovdoáššiid dahje dušše dihto ovddu dahje ášši. Kontonummira rievdadeami várás ferte álo bargat sierranas váldegirjji. Váldegirjji hálddašeaddjis lea vuoigatvuohta oažžut áššiid dikšuma várás vealtatmeahttun suollemas dieđuid, jos váldegirjjis mieđihuvvo dieđuid addin.

Váldegirjji sáhttá ráhkadit maiddái friddjahápmásaččat, go dat beare sisttisdoallá buot dárbbašlaš dieđuid ja fápmudusa addi iežas gieđat vuolláičállosa. Son guhte oažžu fápmudusa galgá leat dievasahkásaš. Váldegirjji sáhttá doaimmahit Kelai OmaKelas, poastta fáro dahje bálvalanbáikái.

Nuppi beales ii doaisttážii sáhte bargat dahje sáddet ohcamušaid neahtas. Ovttasbargoguoimmit ja bargoaddit fas dikšot áššiid Kelas Suomi.fi-fápmudusaiguin.

Loga lasi

Ráva Kela váldegirjeskovi deavdimii sierra gielaiguin