Vuoigatvuohta Kela doarjagiidda olgoriikkain
Jos dus lea vuoigatvuohta Suoma sosiáladorvui, sáhtát dábálaččat oažžut seamma doarjagiid, maid oččošit Suomas. Olgoriikkaide sáhttá máksojuvvot ovdamearkka dihte mánáidruhta, etniiddoarjja ja eará mánnábearrašiid doarjagiid.
Buot Kela doarjagat eai goittotge máksojuvvo olgoriikkaide.
Ealáhagaid máksin olgoriikii
Jos oaččut ealáhaga ja fárret fásta olgoriikii, Kela gaskkalduhttá du ealáhaga mávssu čuovvovaš mánotbaji álggu rájes fárremis. Jos fárret sosiáladorvosoahpamušriikii ealáhaga máksin sáhttá joatkašuvvat. Dáhkádusealáhaga ii goittotge sáhte oažžut sosiáladorvosoahpamušriikkaide.
Kela ii mávsse álbmotealáhaga EU-riikkaide, Eta-riikkaide, Sveiccai iige Stuorra-Británniai 1.2.2025 maŋŋá. Dát boahtá das, ahte láhka lea rievdan. Nuppástus ii guoskkat bearašealáhagaid iige bargoealáhagaid. Bargoealáhagaid mákset bargoealáhatlágádusat.
Jeara Kela bálvalannummiris, mo olgoriikkaide fárren váikkuha du ealáhaga mávssuide: 020 634 0200.
Ovdamearka: Estteeatnamii ealáhatoažžun
Ustibat Márjá ja Rihttá fárreba Estteeatnamii. Márjá oažžu Kelas bargonávccahisvuođaealáhaga. Rihttá oažžu Kelas leaskkaidealáhaga.
Márjjá bargonávccahisvuođaealáhaga máksin gaskkalduvvá čuovvovaš mánotbaji álggu rájes fárremis. Rihttá leaskkaidealáhaga máksin joatkašuvvá.
Ovdamearka: Durkii bargui
Oskár fárre 5 mánotbaji áigái bargui Durkii. Su bearaš fárre mielde. Oskáris ja su bearrašis seailu vuoigatvuohta Kela doarjagiidda, daningo olgoriikkas orruma guhkkodat lea vuollel 6 mánotbaji. Sis lea vuoigatvuohta daidda Kela doarjagiidda, maid sáhttá máksit olgoriikkaide. Olgoriikkaide ii máksojuvvo ovdamearkka dihte almmolaš ássandoarjja dahje mánáid ruoktodikšundoarjja.
Jos Oskára bearaš fárrešii Durkii fásta, sin vuoigatvuohta Kela doarjagiidda nogašii fárremii.
Eurohpálaš buohccedikšunkoarta
Sáhtát diŋgot Kelas eurohpálaš buohccedikšunkoartta. Koarta lea nuvttá. Go dus lea koarta, oaččut buohccádettiin divššu EU-riikkas, Edg-riikkas, Sveiccas ja Stuorra-Británnias seamma hattiin go báikkálaš ássit.
Sáhtát diŋgot koartta neahtas. Neahtas sáhtát diŋgot koartta maiddái iežat mánnái.
Sáhtát diŋgot koartta maiddái bálvalannummiris 020 692 204.
Jos dus ii leat šat vuoigatvuohta Kela doarjagiidda, it sáhte geavahit eurohpálaš buohccedikšunkoartta.