Kela õlmstõõʹtti eeʹjj 2023 ouddõsbrosyyrid
Kela lij õlmstâttam eeʹjj 2023 čiõlggbrosyyrid. Čiõlggǩiõllsa brosyyr čuäʹjtâʹlle Kela õuddõõzzid čiõlggǩiõʹlle jeeʹres jieʹllempooddin. Kela kueiʹm vuäiʹtte še tiʹllʼjed brosyyrid jiõccses.
Kela õlmstâtt kalenteriiʹjji kääuʹc jieʹllempoodd kuõskki čiõlggǩiõllsaž ouddõsbrosyyred. Tõin čiččâm lie ååʹn õlmstõttum lääddas da ruõccâs. Seämmast lie peeiʹvtum še brosyyri sääʹm-, eŋgglõs- da ruõššǩiõllsaž ǩiõllversioid.
Ååʹn valmštõõvvâm brosyyr lie
- Jeältõõǥǥ da jeeʹres jeältõkvuäǯǯai tuärjjõõzz
- Päʹrnnpiârri
- Puõccmõš da säursmâttmõš
- Piʹrǧǧeemtuärjjõs
- Reâuǥteʹmesvuõtt
- Ålggjânnmin Lääʹddjânnma leʹbe Lääʹddjânnmest ålggjânnmid
- Takai jälstemtuärjjõs.
Mättʼtõõttji da prizoovniiʹǩǩi tuärjjõõzzid kuõskki brosyyrid peeiʹvtet lookkâmpââʹj 2023–2024 kuõskkjen, da tõn õlmstââʹttet mââʹjben ǩeâđđa.
Brosyyrid lie peeiʹvtum ođđ ouddõs-suum da jeeʹres eeʹjj 2023 ouddõsmuttâz. Peeiʹvtõõzz õhttvuõđâst brosyyri ålgghäämm lij še siõmmna ođsmam da visuaalʼlaž kuâsttjõõzz lij čiõlǥsmõttum ääiʹjbest.
Lääʹdd- da ruõccǩiõllsa čiõlggbrosyyr da tõi sääʹmǩiõllsaid versioid peeiʹvtet juõʹǩǩ eeʹjj. Sääʹmǩiõllsaž brosyyrin lie vuäǯǯmest versio pukin Lääʹddjânnmest mainstum sääʹmǩiõlin mii miârkkšââvv tâʹvv-, aanar- da nuõrttsääʹmǩiõʹlid. Eŋgglõs- da ruõššǩiõllsaž versioid brosyyrin peeiʹvtet juõʹǩǩ nuuʹbb eeʹjj.
Kueiʹm vuäiʹtte tiʹllʼjed brosyyrid Kelast
Čiõlggbrosyyrid vuäǯǯ Kela kääzzkõs- da äʹššeempaaiʹǩin. Kela vuõlttad čiõlgglääʹdd- da čiõlggruõccǩiõllsaž brosyyrid jiijjâs kääzzkõspaaiʹǩeez õõl veâl õuddmiârkkân sosiaalkonttrid, TE-konttrid da vuäpstõõǥǥid.
Kueiʹm vuäiʹtte tiʹllʼjed čiõlggbrosyyrid da tõi jeeʹres ǩiõllversioid di Kela jeeʹres tiõddum brosyyrid neʹttpååʹšt mieʹldd Kela lomakkääiʹtest addrõõzzâst lomakevarasto@kela.fi. Minimitiʹllʼjõsmieʹrr lij 10 kuʹsǩǩed/vuõlttõs.
Sääʹmǩiõllsaid brosyyrid vuäitt tiʹllʼjed neʹttpååʹšt mieʹldd addrõõzzâst saame@kela.fi. Sääʹmǩiõllsaid brosyyrid vuõltteet taarb mieʹldd še minimitiʹllʼjõõzz uuʹccab meäʹr.
Čiõlggbrosyyrid vuäitt tobdstõõttâd še neeʹttest
Kela brosyyri da infolõõstei pdf-neʹttversioid vuäitt tobdstõõttâd še kela.fi-seeidain. Brosyyri neʹttversioin lie valddum lokku vuällamvuõttõõlǥtõõzz, tõn diõtt plaađummuš ooʹnnast puârast še teâttmašina ikkânlookkjin.
Čiõlggbrosyyri siiskâs käunnai še kela.fi-neʹttseeidain lääʹddǩiõʹlle da ruõccǩiõʹlle di tâʹvv-, aanar- da nuõrttsääʹmǩiõlle.
Čiõlggǩiõll lij jiijjâs-i ǩiõllhäämm
Čiõlggkõõskõs lij miõttâm Kela čiõlggbrosyyrid čiõlggtiõtt. Tiõtt lij miârkkân tõʹst, što õõlmtõs teâudd čiõlggǩiõl kriteeʹrid. Čiõlggǩiõll lij õhtt jiijjâs lääʹddǩiõl häämain, koʹst siiskâs, sannõs da raajâlm lie suåvtum hiâlpben fiʹttjemnalšmen.
Čiõlggmateriaalin äukkjâʹvve aainâs
- oummu, koin lie mošttpuõʒʒâlm leʹbe lookkmõõžž da mättjem vaiggâdvuõđ
- ouddnemvâkksa oummu
- nåkam oummu, koid läʹdd leʹbe ruõcc ij leäkku jieʹnnǩiõl.
Kelast jie jeäʹrben leäkku takaiǩiõllsa ouddõsbrosyyr, tõn diõtt ko lij jurddum, što čiõlggbrosyyr kääzzkâʹstte pukid õõʹnnʼjid. Čiõlggǩiõll suâpp pukid, da ǩii täättas sätt väʹǯǯlõs jieʹllempoodd taarbšed čiõlggǩiõl. Čiõlggǩiõll lij seämmast še šiõǥǥ vuâlggsââʹjjen jåårǥlâttmõõžžid.