EU lääʹmesvuõttkortt
EU lääʹmesvuõttkoortin vuäitak iʹlmmted, što leäk lääʹmes leʹbe što taarbšak vieʹǩǩteei. Vuäitak ââʹnned koort ouddmiârkkân õõlmâs jååttlõõǥǥâst di liikkeem- da kulttuurnoorõõttmõõžžin.
Vuäitak ââʹnned lääʹmesvuõttkoort Lääʹddjânnmest da jeeʹres EU-jânnmin. Kortt mähss 10 euʹrred. Koort haʹŋǩǩummuš lij vääʹldstad.
Ǩii vuäitt ooccâd lääʹmesvuõttkoort?
Vuäitak vuäǯǯad lääʹmesvuõttkoort, jõs tuʹnne lij miõttum kååʹtt-ne täin tuärjjõõzzin da kääzzkõõzzin:
Kela tuärjjõõzz da kääzzkõõzz:
- vuâlla 16-âkksa lääʹmesvuõtt-tuärjjõs
- 16 eeʹǩǩed teâuddam lääʹmesvuõtt-tuärjjõs
- jeältõõǥǥ vuäǯǯai håiddtuärjjõs
- kuullâmlämmaz tuʹlǩǩõskääzzkõs (A)
- kuullâm- da vueiʹnnemlämmaz tuʹlǩǩõskääzzkõs (A)
- särnnamlämmaz tuʹlǩǩõskääzzkõs (A).
Jeeʹres tuʹmmstõõǥǥ da kääzzkõõzz:
- lääʹmeskääzzkõslääʹjj meâldlaž peiʹvvtoimmjummuš
- lääʹmeskääzzkõslääʹjj meâldlaž jååʹđtemkääzzkõs
- sosiaalhuâll-lääʹjj meâldlaž liikkeem tuärjjõs (nuʹt sarnnum jååʹđtemkääzzkõõzzi)
- säʹttemkääzzkõs (A)
- vueiʹnnemlääʹmesvuõttkortt (A)
- ruåtthåiddsuåppmõš (lääʹmesvuõttkortt lij jurddum suʹnne, ǩeän hååidat (A)
- lääʹmeskääzzkõslääʹjj meâldlaž kääzzkõsjälstummuš (A)
- lääʹmeskääzzkõslääʹjj meâldlaž persoonlaž veäʹǩǩ (A)
- spesiaalhuâllprogramm da tõõzz kuulli kääzzkõõzz (A)
- spesiaaltuärjj mättʼtõõzzâst (A)
- vuõiŋŋâmvieʹmmtuʹmmstõk (A).
(A) miârkkšââvv, što vuäitak vuäǯǯad korttsad A-miârkkmõõžž. A-miârkkmõõžž veäkka vuäitak iʹlmmted ouddmiârkkân lippkaaupšeeja, što taarbšak mieʹldd vieʹǩǩteei leʹbe tuärjjoummu.
Vuõlttâd Kela korttooccmõõžž
Jõs haaʹlääk lääʹmesvuõttkoort, vuõlttâd vuõššân Kela årra ooccmõšlomaakk. Õhttât mieʹldd tuʹmmstõõǥǥ tuärjjõõzzâst leʹbe kääzzkõõzzâst, koon vuâđald ooʒʒak koort.
Kela taaʹrǩast, lij-a tuʹst vuõiggâdvuõtt lääʹmesvuõttkoʹrtte. Mâŋŋa tõʹst vuäǯǯak neʹttpååʹšt mieʹldd liiŋk, kooiǥ vuäitak tiʹllʼjed koort.
Looǥǥ tääʹrǩab vuäppõõzzid tõn pirr, mõõn nalla vuäitak ooccâd lääʹmesvuõttkoort (lääddas).