Mo oaččut vuođđoáigáiboahtindoarjaga?

Oza vuođđoáigáiboahtindoarjaga neahtas.

Dárkkis ohcamušas, mat čuvvošat das galget leat mielde. Maiddái čuvvosiid sáhttá sáddet neahtas.

Sáhtát ohcat doarjaga maiddái skoviin, man oaččut Kela doaimmahagain ja neahttasiidduin.

Kela poastačujuhus lea

Kela
PL 10
00056 KELA

Jos it sáhte ohcat vuođđoáigáiboahtindoarjaga neahtas dahje bábirskoviin, sáhtát ohcat dan njálmmálaččat. Riŋge dalle Kelai dahje mana Kela doaimmahahkii.

Man guhká gieđahallan váldá?

Muitte deavdit ohcamuša fuolalaččat. Doaimmat Kelai buot čuvvosiid, mat dárbbašuvvojit. Dat jođálmahttá ohcamuša gieđahallama.

Jos ohcamušas leat visot dárbbašlaš dieđut, oaččut Kelas mearrádusa 7 árgabeaivvi siste. Jos Kela árvvoštallá ovttas duinna, ahte ohcamuš lea hohpolaš, dat čovdojuvvo seammá dahje čuovvovaš árgabeaivve.

Loga lasi áigáiboahtindoarjaga ohcamis (suomagillii).

Goas doarjja máksojuvvo?

Go Kela lea gieđahallan du ohcamuša, oaččut ruoktot mearrádusa. Mearrádusas muitaluvvojit doarjaga sturrodat, ákkastallamat ja máksinbeaivi. Oaččut mearrádusa maiddái dalle, jos dutnje ii leat mieđihuvvon doarjja.

Kela máksá vuođđoáigáiboahtindoarjaga du báŋkokontui mánotbaji 1. báŋkobeaivve.

Jos doarjaga máksin ii geargga jeavddalaš máksinbeaivve, Kela máksá doarjaga dalán mearrádusa dahkama maŋŋá. Dalle ruđat leat du báŋkokonttus 2 báŋkobeaivvi geažes mearrádusa dahkamis.

Kela sáhttá máksit vuođđoáigáiboahtindoarjagis láiggu njuolgga láigoaddái, jos háliidat nie. Kela sáhttá máksit maiddái šleađgarehkega dahje ruovttudáhkádusa njuolgga rehkega sáddejeaddjái, jos háliidat nie.

Go leat ožžon mearrádusa vuođđoáigáiboahtindoarjagis, sáhtát doaimmahit Kelai maiddái mearrádusa maŋŋá boahtán rehkegiid, maid earrebeaivi lea dan áigodagas, goas mearrádus lea fámus. Earrebeaivi dárkkuha vuosttas rehkega earrebeaivvi, ii muittuhanrehkega earrebeaivvi. Mearrádusas muitaluvvo dárkileappot, maid rehkegiid sáhtát doaimmahit Kelai.

Máksinčatnašupmi

Oassi vuođđoáigáiboahtindoarjagis sáhttá addojuvvot máksinčatnašupmin. Máksinčatnašumi sáhttá oažžut ovdamearkan dálkasiidda dahje čalbmelásaide.

Oaččut máksinčatnašumi mearrádusa oktavuođas. Máksinčatnašumis muitaluvvo, maid dainna sáhttá máksit gávppis.

Go dutnje mieđihuvvo vuođđoáigáiboahtindoarjja, oaččut seammás máksinčatnašumi apotehkii. Máksinčatnašumiin oaččut daid reseaptadálkasiid, maid dárbbašat.

Kela sádde dálkasiid máksinčatnašumi njuolgga apotehkii neahta bokte. Apotehkas lea doarvái, ahte čájehat iežat Kela-koartta dahje identitehtaduođaštusa.

Dárbbašatgo veahki?

Sáhtát oažžut persovnnalaš bálvalusa Kela áššedovddis telefovnnas dahje doaimmahagas. Sáhtát oažžut veahki maiddái iežat buresveadjinguovllu sosiálabálvalusain.

Dan lassin Kela sáhttá bargat oktasašbarggu buresveadjinguovllu sosiálabálvalusaiguin. Kela ja buresveadjinguovlu sáhttet bargat ovttasbarggu du dili mielde. Kela ja buresveadjinguovllu sosiálabálvalusat sáhttet deaivvadit du maiddái ovttas. Sáhtát maiddái ieš bivdit oktasaš deaivvadeami.