Jõs siirdčõõđak Lääʹddjânnma
Tuärjjõõzzi määin lie jeeʹresnallšem tõn mieʹldd, siirdčõõđak-a Lääʹddjânnma
- tuâjjliʹžžen leʹbe põõrǥâsneʹǩǩen
- vuõlttuum tuâjjliʹžžen
- piârri vuäzzliʹžžen
- mättʼtõõttjen.
Tuâjjliʹžžen leʹbe põõrǥâsneʹǩǩen Lääʹddjânnma
Vuäitak vuäǯǯad Kela tuärjjõõzzid, jõs reâuǥak Lääʹddjânnmest.
Teʹl tuʹst ij taarbâž jälsted Lääʹddjânnmest põõššjen. Tuʹst lij vuõiggâdvuõtt Kela tuärjjõõzzid tõin määnpõõʹjin ǥu tuu päʹlǩǩ lij uuʹccmõsân nuʹtt 800 euʹrred.
Jõs reâuǥak Lääʹddjânnmest uuʹccmõsân 6 määnpââʹj, tuʹst lij vuõiggâdvuõtt koid-ne Kela tuärjjõõzzid 3 määnpââʹj ääiʹj mâŋŋa reâuggmõõžž puuttmest.
Jõs tuʹst lij Lääʹddjânnmest dommkåʹdd, vuäǯǯak hååid õõlmâs tiõrvâsvuõtthuâlast. Tuu hååidat takainalla jiijjad kååʹdd tiõrvâsvuõttkõõskõõzzâst. Jõs puäđak Lääʹddjânnma reâuggad da tuʹst ij leäkku dommkåʹdd, raauk Kela seʹlvvted, lij-a tuʹst vuõiggâdvuõtt õõlmâs tiõrvâsvuõtthuõllu.
Kõõjj lââʹzz kääzzkâʹsttemnââmrest 020 634 0200.
Sosiaalstaansuåppmõšjânnmin siirdčõõtti tuâjjla
Lääʹddjânnmest lie sosiaalstaan kuõskki suåppmõõžž måtam jânnmivuiʹm.
Jõs puäđak täin jânnmin, tääʹrǩest Kelast, mäʹhtt suåppmõõžž vaaikte tõõzz, vuäitak-a vuäǯǯad Kela tuärjjõõzzid.
Vuõlttuum tuâjjla
Vuõlttuum tuâjjla lie oummu, koid ålggjânnamneǩ tuâjjuʹvddi lij vuõlttääm tuõjju Lääʹddjânnma.
Siirdčõõđak Lääʹddjânnma EU-jânnmest, Etv-jânnmest, Sveiʹccjânnmest leʹbe Jõnn-Britanniast
Jõs puäđak vuõlttuum tuâjjliʹžžen täin jânnmin, kuulak vueʹlǧǧemjânnmad sosiaalstaaʹne. Vuäǯǯak Lääʹddjânnmest kroota puâccjeʹmmen kaiʹbbjum hååid seämma hõõʹddin ko jeärraz Lääʹddjânnmest jälsteei oummu, jõs tuʹst lij euroopplaž puõccihåiddkortt. Vuäǯǯak koort vueʹlǧǧemjânnmastad. Vueʹlǧǧemjânnmad veʹrǧǧneǩ oudd tuʹnne A1-tuõđštõõzz tõʹst, što tuâjjuʹvddjad lij vuõlttääm tuu Lääʹddjânnma tuõjju.
Siirdčõõđak Lääʹddjânnma jânnmest, koin Lääʹddjânnmest lij sosiaalstaansuåppmõš
Jõs puäđak vuõlttuum tuâjjliʹžžen jânnmest, koin Lääʹddjânnmest lij sosiaalstaansuåppmõš, vuäǯǯak suåppmõõžžâst peäggtum tuärjjõõzzid vueʹlǧǧemjânnmest. Vuäitak vuäǯǯad jeeʹres ko suåppmõõžžâst peäggtum tuärjjõõzzid Lääʹddjânnmest, jõs leäk siirdčõõttâm tiiʹǩ põõššjen leʹbe pälkkad lij uuʹccmõsân nuʹtt 800 euʹrred määnpââʹjest.
Siirdčõõđak Lääʹddjânnma jeeʹres åʹrnn
Jõs puäđak Lääʹddjânnma vuõlttuum tuâjjliʹžžen jeeʹres åʹrnn ko EU-jânnmest, Etv-jânnmest, Sveiʹccjânnmest, Jõnn-Britanniast leʹbe sosiaalstaansuåppmõšjânnmest, tuu kueʹsǩǩe seämma määin ko jeärrsid Lääʹddjânnma siirdčõõttâm tuâjjlaid. Tuʹst lij tâʹl vuõiggâdvuõtt Kela tuärjjõõzzid, jõs seerdak Lääʹddjânnma põõššinalla leʹbe jõs päʹlǩǩ lij uuʹccmõsân nuʹt 800 euʹrred määnpââʹjest.