Reâuǥteʹmesvuõttpeiʹvvteäʹǧǧ

Reâuǥteʹmesvuõttpeiʹvvteäʹǧǧ vuäitt leeʹd tiânâspeiʹvvteäʹǧǧ leʹbe vuâđđpeiʹvvteäʹǧǧ.

Tiânâspeiʹvvteäʹǧǧ

Reâuǥteʹmesvuõttkäʹšnn laʹsǩǩad tiânâspeiʹvvtieʹǧǧ meäʹr tiânnsi leʹbe puåttji mieʹldd. Vuäitak vuäǯǯad tiânâspeiʹvvtieʹǧǧ, jõs kuulak reâuǥteʹmesvuõttkäšnna. Ouddmiârkkân jeeʹres ämmatsuõʹrjin lie täujja jiijjâz reâuǥteʹmesvuõttkääʹšn. Lie še reâuǥteʹmesvuõttkääʹšn, koid ǩii täättas vuäitt kuullâd.

Kela ij määuʹs tiânâspeiʹvvtieʹǧǧ, ij-ǥa tõn vueiʹt ooccâd Kelast.

Reâuǥteʹmesvuõttkäʹšnn mähss tiânâspeiʹvvtieʹǧǧ, jõs leäk kuullâm reâuǥteʹmesvuõttkäšnna nokk kuuʹǩǩ da teâudak reâuǥaståårram-määin. Reâuǥaståårram-määin teâuddmõš miârkkšââvv, što leäk leämmaž nokk kuuʹǩǩ reâuǥast ouddâl reâuǥteʹmmen pääccmõõžž.

Tiânâspeiʹvvtieʹǧǧ vuäitt vuäǯǯad jäänmõsân 400 peiʹvved. Jõs leäk leämmaž reâuǥast vuâlla 3 eeʹjj, vuäitak vuäǯǯad tiânâspeiʹvvtieʹǧǧ jäänmõsân 300 peiʹvved.

Kõõjj lââʹssteâđaid tiânâspeiʹvvtieʹǧǧest jiijjad reâuǥteʹmesvuõttkääʹšnest leʹbe Reâuǥteʹmesvuõttkaaʹšni õhttsažorgaanisaatiost (tyj.fi, lääddas).

Vuâđđpeiʹvvteäʹǧǧ

Jõs jiõk leäkku reâuǥteʹmesvuõttkääʹšn vuäzzlaž jiõk-ǥa vuäǯǯ tiânâspeiʹvvtieʹǧǧ, Kela mähss tuʹnne vuâđđpeiʹvvtieʹǧǧ. Tõn vuäitt vuäǯǯad jäänmõsân 400 peiʹvved. Jõs leäk leämmaž reâuǥast vuâlla 3 eeʹjj, vuäitak vuäǯǯad vuâđđpeiʹvvtieʹǧǧ jäänmõsân 300 peiʹvved.

Jõs leäk vuâlla 25-ekksaž, vuâđđpeiʹvvtieʹǧǧ vuäǯǯma lie rääʹjtõõzz.

Looǥǥ lââʹzz vuâđđpeiʹvvtieʹǧǧ ooccmest (lääddas).

Mâʹmmet vuâđđpeiʹvvtieʹǧǧ vuäǯǯ?

Vuâđđpeiʹvvteäʹǧǧ lij 37,21 euʹrred peeiʹvest, da vuäǯǯak tõn 5 peeiʹvest neäʹttlest.

Vuâđđpeiʹvvtieʹǧǧest määuʹset piiđid.

Vuäitak ärvvtõõllâd laʹsǩǩeem-mašina veäkka, mâʹmmet vuäǯǯak vuâđđpeiʹvvtieʹǧǧ (lääddas).

Reâuǥaståårram-mäinn

Što vuäǯǯak vuâđđpeiʹvvtieʹǧǧ, ton õõlǥak tieuʹdded reâuǥaståårram-määin.

Reâuǥaståårram-mäinn nårrai

• õhtt määnpââʹjj, jos leäk vuäǯǯam määnpââʹj äiʹǧǧen pääʹlǩ ooʹccmõsân 930 euʹrred
• pieʹll määnpââʹj, jõs leäk vuäǯǯam määnpââʹj äiʹǧǧen pääʹlǩ ooʹccmõsân 465 leša vuâlla 930 euʹrred.

Teâudak reâuǥaståårram-määin, ko täk reâugaståårram-määnpââʹj lie nårrjam õhttsiʹžže 12 mââimõs 28 määnpââʹj äiʹǧǧen.

Reâuggmõõžž måtam nuuʹbb EU- leʹbe Etv-jânnmest leʹbe Sveiʹccjânnmest vueiʹtet še laʹsǩǩeet mieʹldd.

Reâuǥaståårram-mainnu vueiʹtet laʹsǩǩeed mieʹldd reâuǥ še kuuʹǩǩab ääiʹjest ko 28 määnpââʹjest ouddmiârkkân tâʹl, jõs

• leäk puõccâm
• leäk mättʼtõõttâm
• leäk håiddam vuâlla 3-ekksaž päärnžad
• leäk vuässõõttâm TJ-konttâr jäʹrjstem tååimaid.

Põõrǥâsneeʹǩǩest lij jiijjâs reâuǥaståårram-mäinn. Jõs leäk põõrǥâsneǩ, tääʹrǩest vuâđđpeiʹvvtieʹǧǧ määinaid Kelast.

Reâuǥteʹmmen ålggjânnmin

Vuäitak vuäǯǯad reâuǥteʹmesvuõttpeiʹvvtieʹǧǧ måtam vuõʹjjin še teʹl, ko leäk ålggjânnmin da ooʒʒak toʹben reâuǥ.

Vuäitak kõõččâd lââʹzz kääzzkâʹsttemnââmrest 020 692 210.