Staanlaž äʹššummuš MuuKelast

Leäkku täʹrǩǩen, ǥu ǩeeʹrjtõõđak MuuKela sizz. Neeʹttest liâ vuõigg neʹttseeidai vuâkksaž paaimtemseiddõõzz. Tõid vueiʹtet še raajjâd Kela nõʹmme. Ko ooumaž oudd neʹttbaŋkktiõttâs paaimtemseiddõʹsse, reäkkõsneeʹǩǩ vuäǯǯa piâssmõõžž oummu neʹttbaʹŋǩǩe da vueiʹtte suâleed tiilâst tieʹǧǧid. Pââimtemseiddõõzzid vueiʹtet raajjâd baaŋki, Jiijjankanta leʹbe Kela nõõm ââʹneeʹl.

MuuKela-kääzzkõõzzâst ij leäkku pååđ mobiilsuåvldõs. MuuKela sizz vuäitt ǩeeʹrjtõõttâd tåʹlǩ plaađnjin mõõneeʹl addrõʹsse www.kela.fi. Jeäʹl ǩeeʹrjtõõđ MuuKela sizz neʹttpååšta puõʹtti liiŋkâst leʹbe neeʹtt ooccâm-mašinapuʹhttõõzzin.

Vuäppõõzz staanlaž äʹššummša MuuKelast

1. Jõs âânak järrsi âânnmõõžžâst åårrai teâttmašina ouddmiârkkân ǩeʹrjjpõõrtâst leʹbe Kela kääzzkâʹsttempääiʹǩest da oouʹdbuž õõʹnni lij kuâđđam plaađânj äävai, jåttʼted plaađânj oʹđđest.
2. Ǩeeʹrjet plaađânj addrõsrieʹdde www.kela.fi. Ko puäđak sijddu, addrõsriâddâst kuâsttai lookk kovv. Tät miârkat tõn, što teâđaid vuõltteet staanâld kela.fi-sijddu ij-ǥa tõid vueiʹt haursted.
3. Vaʹlljed kela.fi-seeidast teäddõk Ǩeeʹrjtõõđ sizz (Kirjaudu).
4. Ǩeeʹrjtõõđ sizz (Kirjaudu) -teäddõõǥǥâst ävvan Suomi.fi-kääzzkõõzzâst leʹddi ǩeeʹrjtõõttâmseidd, koʹst piâzzak vaalšed tuu baaŋk leʹbe jeeʹres haaʹleemad tobddeemnääʹl. Suomi.fi lij õõlmâsvaaldâšm õhttsaž tobddeemkääzzkõs, da še toʹben teâđaid vuõltteet staanâld. Seeid addrõõzz vueʹssen lååkk tunnistautuminen.suomi.fi, da addrõsriâddâst lij lookk kovv.
5. Tobddõõđ kääzzkõʹsse juʹn-a neʹttbaŋkktiõttin leʹbe mobiilstaanõõǥǥin.

   • Jõs tobddõõđak MuuKela sizz neʹttbaŋkktiõttivuiʹm, vuäitt kääzzkõstaʹrjjeeʹjen kuâsttjed Osuuspankki (OP), håʹt-i tuu ââʹnnmest leʹčče kååʹtt-ne jeeʹres baaŋk tiõtt.
   • Jõs tobddõõđak mobiilstaanõõǥǥin, kääzzkõstaʹrjjeeʹjen vuäitt kuâsttjed Telia. Tät ij vaaikât tobddummša: kela.fist lij pâi staanlaž ǩeeʹrjtõõttâd MuuKela sizz.
6. Ǥu loopptak MuuKela âânnmõõžž, ǩeeʹrjtõõđ meädda seeidast. Kuârad še tuu plaađânj seiddhistoria da kõskkmoošt di piij ǩidd puk äävai åårrai plaađânjikknid. Tät lij vääžnai jeäʹrben tâʹl, ǥu âânak še järrsi âânnmõõžžâst åårrai teâttmašina.
7. Ruõkk kela.fi-seeid jiijjad aparaʹtte plaađânj ǩeʹrjjmiârkid leʹbe miõllsumõs seeidaid. Piâzzak nääiʹt sijddu pueʹtti vuâra vuõiʹǧǧest ââʹnǩani ooccâm-mašinaid.