Kela ij innig mieđeet rävisolmoošškovlimtorjuu loovnâtáhádâs uđđâ uápui várás porgemáánu 2024 rääjist
Ovdâskodde lii meridâm rävisolmoošškovlimtorjuu looppâtmist. Lahânubástus mield Kela ij innig mieđeet rävisolmoošškovlimtorjuu loovnâtáhádâs uápui várás, moh älgih porgemáánust teikâ ton maŋa.
Ovdâskodde lii tuhhiittâm nubástusâid, maid haldâttâs lii iävtuttâm rävisolmoošškovlimtorjuin adelum laahân. Taan räi päälhiuážžoo tâi irâtteijee lii puáhtám uuccâđ rävisolmoošškovlimtorjuu Työllisyysrahasto-ruttâráájust. Uáppest, kote lii finnim rävisolmoošškovlimtorjuu, lii lamaš meid vuoigâdvuotâ uáppuloovnâ staatâtáhádâsân (suomâkielân), mon lii mieđettâm Kela.
Lahânubástus mield rävisolmoošškovlimtoorjâ ij mieđettuu uđđâ uápui várás innig 1.8.2024 rääjist. Torjuu lii máhđulâš finniđ uápui várás, moh láá álgám majemustáá 31.7.2024. Torjuu puáhtá paajeedškyettiđ ovdil porgemáánu 2024, já tom puáhtá finniđ ive 2025 loopâ räi. Äigirääjih kyeskih meid rävisolmoošškovlim loovnâtáhádâsân.
Ive 2023 Työllisyysrahasto-ruttârááju maavsij rävisolmoošškovlimtorjuu 32 518 ulmui. Rävisolmoošškovlim loovnâtáhádâs finnij Kelast 9 074 olmožid.
Maid torjuid rävisolmoošuáppee puáhtá puátteevuođâst finniđ Kelast?
Lahânubástus maŋa rävisolmoošuáppeeh pyehtih uuccâđ já finniđ Kela mieđettem uápputorjuu. Uápputorjui kulá uáppuruttâ já uáppuloovnâ staatâtáhádâs.
Ollâškovlâuápui várás puáhtá finniđ uápputorjuu, jis uáppee ij lah kiävttám puoh uápputoorjâmánuppoojijd suu oovdeb ollâškovlâuáppoid.
Nube tääsi uápuin, ovdâmerkkân áámmátlii oppâlájádâs uápuin, ij lah uápputoorjâmánupoojij várás raijim. Uáppee puáhtá te finniđ uápputorjuu, veikâ sun ličij jo ovdil čođâldittám nube tääsi totkos. Toos lasseen nube tääsi uáppee puáhtá finniđ Kelast škovlâmätkitorjuu, jis suu škovlâmätki lii kukke. Uáppee ahe já puáđuh iä vaaigut škovlâmätkitorjuu finniimân.
Rävisolmoošuáppee, kote finnee uápputorjuu, kalga kuittâg väldiđ huámmášumán uápputorjuu ihepuáturaajijd. Puáđuh váldojeh huámmášumán oles ive ääigi, te uápputorjuu ij veltihánnáá finnii, jis lohá uápuid pargo paaldâst. Kela váldá ihepuáturaajijn huámmášumán oles uáppuääigist finnejum puáđuid kalenderiivij mield. Uápui algâttemmánuppaje ovdebááh já valmâštumemánuppaje maŋa finnejum puáđuh pyehtih kuittâg-uv leđe mon peri stuárráh.
Uáppuruuđâ já uáppuloovnâ staatâtáhádâs puáhtá kuittâg uuccâđ. Jis uáppee puáđuh láá liijkás stuárráh, te sun puáhtá keessiđ maasâd tâi macâttiđ uáppuruuđâid, ko uáppulovnâ lii pajedum.
Rävisolmoošuáppee puáhtá finniđ jieijâs uáppuriijâ ääigist meid almos aassâmtorjuu. Aassâmtorjust puáturaajijn váldojeh huámmášumán meid siämmáá purrâmušjuávkun kullee eres ulmui puáđuh.
Lasetiäđuh