Mánáiddikšuma doarjagat bearašfriijaid maŋŋá
Vánhemiidfriija maŋŋá dahje vánhemiidruhtabajiid gaskkas sáhtát
- oažžut ruoktodivššu doarjaga, jos mánná ii oassálastte gieldda árrabajásgeassimii
- oažžut ruoktodivššu dahje priváhta divššu doarjaga, jos mánná oassálastá priváhta árrabajásgeassimii.
Sáhtát maiddái oažžut njuovžilis dikšunruđa, jos barggat eanemustá 30 diimmu vahkus eaige dutnje máksojuvvo vánhemiidbeaiveruđat. Mánáiddikšuma doarjagat eai máksojuvvo vuollel mánotbaji áiggis.
Ruoktodikšodoarjja
Ruoktodikšodoarjaga sáhtát ohcat, jos vuollil 3-jahkásaš mánná dikšojuvvo eará sajis go gieldda árrabajásgeassimis, ovdamearkan ruovttus. Dikšun sáhttá leat máná vánhen dahje gii nu eará, ovdamearkan áhkku, áddjá dahje bálkáhuvvon dikšu.
Sáhtát oažžut ruoktodikšodoarjaga, go máná riegádeamis lea gollan 160 árgabeaivvi. Dalle mánná lea sulaid 6 mánotbaji ahkásaš.
Ruoktodikšodoarjaga ii sáhte oažžut, jos mánná lea gieldda árrabajásgeassimis. Ruoktodikšodoarjja sisttisdoallá dikšunruđa ja dikšunlasi. Iežat ruovttugielda sáhttá dan lassin máksit gielddalasi.
Dikšunruhta lea
- sulaid 378 euro mánotbajis ovtta vuollil 3-jahkásaš mánás
- sulaid 113 euro mánotbajis juohkehaš eará bearraša vuollil 3-jahkásaš mánás
- sulaid 73 euro mánotbajis juohke badjel 3-jahkásaš muhto vuollil skuvlaahkásaš mánás.
Dikšunlasi oažžu dušše ovtta mánás ja dat lea eanemustá sulaid 202 euro mánotbajis. Dikšunlasi mearri lea sorjavaš vánhemiid boađuin. Muhtun gielddat mákset ruoktodikšodoarjaga lassin gieldalasi. Jeara ruoktogielddastat dahje Kelas, sáhtátgo oažžut gielddalasi.
Ruoktodikšodoarjagis gesso vearru.
Priváhta dikšuma doarjja
Sáhtát oažžut priváhta dikšuma doarjaga, jos máná divššus vástida bálkáhuvvon dikšu dahje priváhta árrabajásgeassinbáiki. Priváhta dikšuma doarjaga sáhttá oažžut, jos mánná lea deavdán 9 mánotbaji, muhto lea ain vuollil skuvlaahkásaš. Doarjaga ii sáhte oažžut, jos mánná lea gieldda árrabajásgeassimis. Priváhta dikšuma doarjagii gullet dikšunruhta ja dikšunlassi. Du ruovttugielda sáhttá dán lassin máksit gielddalasi.
Dikšunruhta lea sulaid 192 euro mánotbajis. Jos mánná lea ovdaoahpahusagis ja árrabajásgeassimis oasseáigásaččat, dikšunruhta lea sulaid 71 euro mánotbajis.
Dikšunruđa lassin sáhtát oažžut dikšunlasi. Dat lea eanemustá sullii 266 euro mánotbajis. Dikšunlasi mearri mearrašuvvá boađuid vuođul. Jos oaččut unnit dikšunruđa, de maiddái dikšunlassi lea uhcit.
Kela máksá priváhta dikšuma doarjaga bálkáhuvvon dikšui dahje árrabajásgeassinbáikái.
Priváhta dikšuma doarjagis gesso vearru.
Njuovžilis dikšunruhta
Sáhtát oažžut njuovžilis dikšunruđa, jos barggat eanemustá 30 diimmu vahkus ja eará áiggiid divššot mánát. Kela máksá njuovžilis dikšunruđa vuollil 3-jahkásaš mánás.
Njuovžilis dikšunruđa sáhttá máksit goappáge vánhemii. Dalle goabbáge vánhen galgá bargat oanehut bargobeaivvi go dábálaččat. Soai galgaba dikšut máná sierra áiggiid dahje sierra beivviid.
Njuovžilis dikšunruhta máksojuvvo bargoáiggi mielde. Dikšunruhta sáhttá leat juogo sulaid 269 euro mánotbajis dahje sulaid 179 euro mánotbajis dan mielde, man olu gaskamearálaččat barggat vahkus.
Kela máksá njuovžilis dikšunruđa ovtta vánhemii ain hávil ja dušše ovtta mánás.
Njuovžilis dikšunruđas gesso vearru.
Oassedikšunruhta
Sáhtát oažžut oassedikšunruđa, go leat barggus eanemustá 30 diimmu vahkus máná dikšuma geažil. Kela máksá oassedikšunruđa mánás guhte lea 1. dahje 2. luohkás skuvllas. Oassedikšunruhta lea sulaid 108 euro mánotbajis. Das gesso vearru.
Kela máksá oassedikšunruđa ovtta vánhemii ain hávil ja dušše ovtta mánás.
Seamma vánhemii ii sáhte máksit oktanaga oassedikšunruđa ja njuovžilis dikšunruđa.