Doarjja skuvlamátkkiide ja borademiide

Skuvlamátkedoarjja

Skuvlamátkedoarjagis leat sierra eavttut stuđeanttaide, geain lea vuoigatvuohta nuvttá skuvlejupmái, ja eará stuđeanttaide.

Skuvlamátkedoarjja stuđentii, geas lea vuoigatvuohta nuvttá skuvlejupmái

Sáhtát oažžut doarjaga skuvlamátkkiide, jos čađahat ovdamearkka dihte

• logahatoahpuid dahje rávesolbmuid logahatoahpuid
• ámmátlaš vuođđodutkosa
• ámmátdutkosa
• válbmejeaddji skuvlema, ovdamearkka dihte TUVA-skuvlema
• oahppogeatnegasaide dárkkuhuvvon friddja čuvgehusbarggu skuvlema.

Sáhtát oažžut doarjaga, jos du skuvlamátki ovtta guvlui lea unnimustá 7 kilomehtera.

Jos dus leat unnimustá 15 mátkebeaivvi kaleanddarmánotbajis, sáhtát oažžut dievas skuvlamátkedoarjaga.

Jos dus leat skuvlamátkkit 10–14 beaivve kaleandarmánotbajis, sáhtát oažžut beali dievas skuvlamátkedoarjagis.

Jos geavahat iežat skuvlamátkkiin almmolaš johtolaga dahje skuvlasáhtu, it dábálaččat mávsse mátkkiin maidege.

Skuvlamátkedoarjja stuđentii, geas ii leat vuoigatvuohta nuvttá skuvlejupmái

Sáhtát oažžut doarjaga, jos čađahat ovdamearkka dihte

• logahatoahpuid
• ámmátlaš vuođđodutkosa
• válbmejeaddji skuvlema, ovdamearkka dihte TUVA-skuvlema.

Sáhtát oažžut doarjaga, jos du skuvlamátki ovtta guvlui lea unnimustá 10 kilomehtera.

Jos dus leat skuvlamátkkit uhcimustá 15 beaivve kaleandarmánotbajis, sáhtát oažžut dievas skuvlamátkedoarjaga.

Jos dus leat skuvlamátkkit 10–14 beaivve kaleandarmánotbajis, sáhtát oažžut beali dievas skuvlamátkedoarjagis.

Vai don sáhtát oažžut dievasmearálaš doarjaga, eaktun lea mátkebeivviid lassin dat, ahte mátkkit mákset badjel 54 euro mánotbajis. Dalle mávssat dábálaččat mátkkiin ieš 43 euro mánotbajis.

Vai don sáhtát oažžut beali dievasmearálaš doarjagis, eaktun lea mátkebeivviid lassin dat, ahte mátkkit mákset badjel 27 euro mánotbajis. Dalle mávssat dábálaččat mátkkiin ieš 21,50 euro mánotbajis.

Sáhtát oažžut skuvlamátkedoarjaga, vaikke du mátkkit mákset uhcit, jos geavahat man nu čuovvovaččain:

• Waltti-johtolat, mii doaibmá máŋgga gávpogis
• Helssega guovllu johtolat HSL
• Tampere guovllu johtolat Nysse
• Turku guovllu johtolat Föli
• skuvlasáhttu
• sáhttu, man leat ieš ordnen.

Oaččut lassidieđuid Waltti-johtolagas čujuhusas waltti.fi (suomagillii).

Skuvlasáhttu oaivvilda dan,
ahte oahppolágádus dahje gielda ordne dutnje skuvlasáhtu dahje oastá dutnje mátkebileahtaid skuvlamátkkiide. Oaččut lassidieđuid skuvlasáhtus iežat oahppolágádusas.

Jos dus ii leat almmolaš johtolat dahje skuvlasáhttu geavahusas, sáhtát mátkkoštit skuvlii nu mo ieš válljet, ovdamearkka dihte iežat biillain dahje vánhema sáhtuin.

Sáhtát árvvoštallat rehkenastiin, man olu oaččut doarjaga (suomagillii).

Skuvlamátkedoarjaga ohcan

Oza skuvlamátkedoarjaga OmaKelas.

Du beales maiddái du fuolaheaddji sáhttá ohcat doarjaga MuKelas.

Kela máksá doarjaga geavahuvvon mátkkoštanvuogi mielde njuolgga bileahttavuovdái, oahppolágádussii dahje dutnje.

Galggat ohcat skuvlamátkedoarjaga juohke oahppojahkái sierra.

Loga lasi skuvlamátkedoarjaga ohcamis (suomagillii).

Boradandoarjja

Jos stuđeret allaskuvllas, sáhtát oažžut vuoládusa borademiin restoráŋŋain, mat leat fárus boradandoarjagis.

Mávssat mállásis unnit supmi, go čájehat stuđeantakoartta dahje Kela boradandoarjjakoartta.

Restoráŋŋat, mat leat searvan boradandoarjagii (suomagillii).