Artikkel
Nääiʹt ooudak väʹlddummuž nuuʹbb ooumže håiddad aaʹššääd väʹlddǩiiʹrjin
Õlmstõttum 12.8.2024
Väʹlddǩiiʹrjin vuäitak uʹvdded väʹlddõõzz nuuʹbb ooumže håiddad Kela-aaʹššääd teʹlfoonâst, kääzzkõspääiʹǩest da ǩeeʹrj mieʹldd. Väʹlddummša kuulli aaʹšši fiʹttjummuš tääʹrǩben vuäitt leeʹd nääʹltem ǩiõl määinast leʹbe håʹt mâka tõn diõtt, što jiiʹjjes kulttuurâst väʹlddummuš ij leäkku. Jos väʹlddummuž Ij fiʹtte, vuäitt äʹššneeʹǩǩ vuõiggâdvuõttstaan jåårǥled vaar vuâlla. Kela ođđ vuäppõs čiõlǥsmâtt määŋgain jeeʹres ǩiõlin tõn, mâid väʹlddummuš miârkkšââvv da ǩeäzz tõn vuäitt tuejjeed.
Tän väʹlddummuš miârkkšââvv da nääiʹt vuäitak väʹlddeed nuuʹbb håiddad aaʹššääd
- Kela-aaʹššid ij leäkku päkk håiddad jiõčč, peʹce taarb mieʹldd kååʹtt-ne jeeʹres vuäitt håiddad tõid peäʹlstad. Tõn vääras âlgg tuejjeed väʹlddǩeeʹrj (VAL3). Tiuddâd väʹlddǩeeʹrj päikka 1 teâđääd.
- Vuäitak jiõčč vaʹlljeed, ǩeäzz ooudak väʹlddǩeeʹrj. Son âlgg kuuitâǥ leeʹd ooʹccmõsân 18-ekksaž. Ooumžed, kååʹtt ääššad nuuʹbb oummu peäʹlest väʹlddǩiiʹrjin, kååččat väʹlddneʹǩǩen.
- Jiõčč mieʹrrääk, koid aaʹššid väʹlddneǩ vuäitt håiddad. Vuäitak uʹvdded suʹnne lååʹv håiddad pukid aaʹššääd leʹbe tåʹlǩ õõut ääʹšš. Son vuäitt ouddmiârkkân ooccâd ouddõõzz leʹbe iʹlmmted muttsin. Son vuäitt še vuäǯǯad väʹlddneʹǩǩen aaʹšši håiddam vääras peeitast ââʹnnem vuâllsaž teâđääd, mâʹte teâđaid ouddõõzzääd, tällõõzz vueʹjj pirr leʹbe tiõrvâsvuõttvueʹjjstad.
- uuʹbb peäʹlest vuäitt äʹššeed teʹlfoonâst, kääzzkõspääiʹǩest leʹbe ǩeeʹrj mieʹldd.
- Jos haaʹlääk, što väʹlddneǩ håidd tuu peäʹlest tåʹlǩ õõut ouddõʹsse kuulli aaʹššid, ǩeeʹrjet väʹlddǩerjja kõõččmõõžžâst åårrai ouddõõzz nõõm, ouddmiârkkân jälstemtuärjjõs.
- Hoʹhsse! MuuKelast äʹššeem vääras äʹššneǩ âlgg uʹvdded nuuʹbb ooumže Suomi.fi-väʹlddõõzz, koonn nõmm lij Sosiaalstaan ouddõsaaʹšši håiddmõš (Sosiaaliturvan etuusasioiden hoitaminen). Looǥǥ lââʹzz nuuʹbb peäʹlest äʹššeem diõtt OmaKelast.
- Tõn še mieʹrrääk jiõčč, kuuʹǩǩ-a väʹlddǩeʹrjj lij viõǥǥâst. Tõt lij viõǥǥâst juʹn-a meäʹrteʹmes ääiʹj leʹbe tiõttum peiʹvvmeäʹr räjja. Vuäitak kuäʹss täättas muʹtted še väʹlddǩeeʹrj viõǥǥâståårrmõõžž leʹbe jårrâʹstted ouddmad väʹlddummuž iʹlmmteeʹl Kelaaʹje. Ton jiõk taarbâž iʹlmmted määin jorrâʹsttma.
- Tuu vuâllaǩeeʹrjtõs väʹlddǩeeʹrjest ainsmâtt tõn, što leäk jiõčč ouddam väʹlddummuž.
Väʹlddǩeeʹrj uvddjen vuäitak tooiʹmted väʹlddǩeeʹrj MuuKelast, pååʹšt mieʹldd leʹbe kääzzkõspäikka. Väʹlddneǩ vuäitt tooiʹmted väʹlddǩeeʹrj pååʹšt mieʹldd leʹbe kääzzkõspäikka.
Vuäppõs väʹlddǩeʹrjjlomaakk tiuddummša jeeʹres ǩiõlivuiʹm
- Nuõrttsääʹmǩiõʹlˈle: Nuuʹbb oummu peäʹlest äʹššummuž – Vuäʹpstõs väʹlddǩeʹrjjlomaakk teâuddmõʹšše (pdf)
- Tâʹvvsääʹmǩiõʹlˈle: Nuppi beales áššiid dikšun – Ráva váldegirjeskovi deavdimii (pdf)
- Aanarsääʹmǩiõʹlˈle: Nube peeleest ášástâllâm – Raavâ väldikirjeluámáttuv tevdimân (pdf)
- Lääʹddǩiõʹlˈle: Toisen puolesta asiointi – Ohje valtakirjalomakkeen täyttämiseen (pdf)
- Ruõccǩiõʹlˈle: Sköta ärenden för en annan person – Anvisningar om hur fullmaktsblanketten ska fyllas i (pdf)