Mäʹhtt sosiaalstaan sååjj sääʹmǩiõlid? Tobdstõõđ sääʹmǩiõllsaž kela.fi-seiddõʹsse da vaʹstted maacctõskõõjjõʹsse
Kela sääʹmǩiõllsa neʹttseeid taʹrjjee teâđ Kela ouddõõzzin da kääzzkõõzzin koolm sääʹmǩiõʹlle. Maacctõskõõjjõõzzâst vuäitak särnnad mâiʹd joordak seeidain da vieʹǩǩted miʹjjid oouʹdeed tõn.
Kela õlmstõõʹtti sääʹmǩiõllsaid neʹttseeidaid iiʹjjin 2019–2020. Neʹttseeid âʹnne seʹst vuâđđteâđaid Kela ouddõõzzin da kääzzkõõzzin tâʹvvsääʹmǩiõʹlle, aanarsääʹmǩiõʹlle da nuõrttsääʹmǩiõlle. Lââʹssen seiddõõzzâst vuäʹpstet Kela sääʹmǩiõllsaž äʹššneǩ-kääzzkõõzzâst, da toʹben käunnʼje še Kela õlmstâʹttem sääʹmǩiõllsa lomaakk. Seiddõõzzâst õlmstââʹttet še sääʹmǩiõllsaid teâđtõõzzid.
Sääʹmǩiõllsaid seeidaid õõudâsviiǥǥât vueʹssen määŋgǩiõllsaž kela.fi-seiddõõzz. Seiddõõzz peeiʹvtet eeǥǥlanji.
Kela lij õlmstâttam sääʹmǩiõllsaž seiddõõzzâst kõõjjõõzz, koin tõt nåårr maacctõõzz seiddõõzzâst. Kõõjjõʹsse tuäivat eʹtǩǩõõzzid tõʹst, mõõnn nalla seiddõõzz õõlǥči oouʹdeed puäʹđlvest.
– Mij Kelast haaʹleep tieʹtted tõn, mõõnn nalla leäʹp oʹnstam teâđted Kela-aaʹššin sääʹmǩiõlivuiʹm, särnn saaǥǥtõõzz äʹšštobddi Arja Jomppanen.
Jomppanen tuäivv, što sääʹmǩiõllsa äʹššneeʹǩǩ altteʹče tobdstõõttmõõžž Kela ouddõõzzid da kääzzkõõzzid sääʹmǩiõllsain seeidain. Täujja vuäʹnkõs vuâđđteâđ riʹjttje äʹššnekka jiiʹjjes ääʹšš aʹlǧǧe piijjma. Taarb mieʹldd lââʹssteâđ vuäǯǯ Kela äʹššneǩ-kääzzkõõzzâst leʹbe lääʹddǩiõllsain neʹttseeidain.
Sääʹmǩiõllsaž seiddõs tuärjjad sääʹmǩiõllsai Kela-äʹššummuž
Sääʹmǩiõllsa seeid tuärjjee sääʹmǩiõllsai jiiʹjjesǩiõllsa äʹššummuž taʹrjjeeʹl Kela-sannõõzz nuʹtt Kela äʹšštobddji ǥu äʹššniiʹǩǩi da Kela kuõiʹmi âânnmõʹšše. Sääʹmǩiõllsaž Kela-sannõs õuddan tõn mieʹldd, ǥu ođđ siiskõõzzid õlmstââʹttet.
Kela tuejjad sääʹmǩiõli jåårǥlâʹttemaaʹššin õhttsažtuâj sääʹmteeʹǧǧ sää′mǩiõl konttrin. Nääiʹt ainsmââʹttet sannõõzz ceâlaivuõđ jeeʹres õhttvuõđin neʹttseeidain äʹššeemkääzzkõʹsse da lomaakkid.
Sääʹmǩiõllsaž seiddõs lij tääuʹjmõsân Kela sääʹmǩiõllsa saaǥǥtõõzz kanaalân. Seiddõõzzâst leʹjje eeʹjj 2024 nuʹtt 6000 jooʹttjed. Jooʹttimieʹrr lâssni 12 % õõuʹdab eeʹjjest.
Kela sääʹmǩiõllsaž kääzzkõõzz vuâđđâʹvve sääʹmǩiõll-läkka. Pueʹreeʹl sääʹmǩiõllsaž kääzzkõõzz da saaǥǥtõõzz põrggâp ainsmâʹtted, što sääʹmǩiõllsai äʹššniiʹǩǩi ǩiõlʼlaž vuõiggâdvuõđ da õõutverddsažvuõtt teâuddje Kela kääzzkõõzzin.
Vaʹstted kõõjjõʹsse da vieʹǩket miʹjjid pueʹreed seiddõõzz
Kela lij ääʹvääm sääʹmǩiõllsaž seiddõõzzâst kõõjjõõzz, koin tõt nåårr maacctõõzz seiddõõzzâst. Maacctõõzz veäkka Kela pueʹrad seiddõõzz ääiʹjbuužž pueʹrben. Kõõjjõs lij äävai 12.3.–30.4.2025. Kõõjjõʹsse vuäitt vaʹstteet nuõrttsääʹmǩiõlle,aanarsääʹmǩiõʹlle da tâʹvvsääʹmǩiõʹlle da lääʹddǩiõʹlle.
Tobdstõõđ sääʹmǩiõllsaid neʹttseeidaid da vaʹstted maacctõskõõjjõʹsse.