Halltõsprogramm liʹnjjʼjad määŋgaid muttsid sosiaalstaaʹne – Kela valmštââtt tiuʹddepiijjmõʹšše da saaǥǥat muttsin tuʹmmstõktuâj ouddneen
Ođđ halltõsprogramm âânn seʹst määŋgaid sosiaalstaan kuõskki muttsid. Kela tobdstââtt halltõsprograʹmme da valmštââtt puõʹtti tuʹmmstõõǥǥi tiuʹddepiijjmõʹšše. Muttâz jiâ teâuddjõõv tâʹlskani, ǥu tõin čiõlǥtet äʹššnekka tõn mieʹldd ǥu tõid õhttneei tuʹmmstõktuâjj ouddan.
Piâtnâc õlmstõttum ođđ halltõsprogramm âânn seʹst määŋgaid sosiaalstaaʹne õhttneei muttsid da linjjõõzzid, kook vaaikte Kela tåimmjummša da äʹššniiʹǩǩi aʹrǧǧe. halltõsprograamm mieʹldd vaalpââʹj poodd lij miârktõs viikkâd čõõđ miârkteei muttsid jeäʹrbi mieʹldd jälstummuž tuärjjõõzzid, tuâjteʹmesvuõttstaaʹne da piʹrǧǧeemtuärjjõʹsse. Še ođđ Kela koʹrvveem-mall di õõut ooccmõõžž maall ooudâsviikkmõš vaaikte vaiddsânji nuʹt Kelaaʹje ǥu tõn õhttsažtuâjjkuõiʹmid da äʹššniiʹǩǩid.
– Leäʹp seuʹrrjam halltõs-saǥstõõllmõõžži ouddnummuš aktiivlânji da taʹrjjääm tuʹtǩǩuum teâđaid di tõn vuâđald tuejjeem ehdtõõzzid sosiaalstaanriâžldõõǥǥi pueʹrummšen. Ååʹn tobdstõõttâp halltõsprograʹmme tääʹrǩeld da valmštõõttâp puõʹtti tuʹmmstõõǥǥi tiuʹddepiijjmõʹšše, Kela väʹlddjååʹđteeʹjj Outi Antila särnn.
Muttâz jiâ teâuddjõõv tâʹlskani
Ođđ halltõsprogramm liʹnjʼjad määŋgaid muttsid še tuärjjõõzzid da kääzzkõõzzid, koid Kela taʹrjjad äʹššniiʹǩǩid. Halltõsprograammâst åårrai oođummuž jiâ teâuddjõõv tâʹlskani pâi serddje noʹrmaaʹle tuʹmmstõktuâjjprosessa. Lääʹjjšiõttummuž muttsest âlgg vuõššân valmštõõllâd halltõõzz čuäjtõs, kååʹtt mâânn eeʹttiǩ-kååʹdd ǩiõttʼtõõllâm vuâlla.
– Fiʹttjep, što halltõsprograammâst määŋg eʹtǩǩuum muttâz cåuʹnne äʹššniiʹǩǩin huõlid. Halltõsprogramm ǩiččlââtt miljardklaass šeäštaid õõlmâs tällõõzzâst, da vaaiktõõzz kueʹsǩǩe še Kela tuärjjõõzzid da äʹššniiʹǩǩid. Täʹst ååʹn jeäʹp kuuitâǥ veâl tieʹđ, mäʹhtt puõʹtti lääʹjjšiõttummuž vaaikat äʹššniiʹǩǩi ouddõõzzid da kääzzkõõzzid. Täk ääʹšš räʹtǩǩeet lääʹjjvalmštõõllmõõžž õhttvuõđâst, Antila särnn.
Äʹššniiʹǩǩid Kela saaǥǥat pueʹttmen åårrai muttsin jiijjâs kanaalin tâʹlskani, ǥu tuʹmmstõõǥǥi siiskõs da ääʹšš täʹrǩsmâʹvve pueʹrben.
–- Ââʹnnep aktiivlânji õhttvuõđ še õhttsažtuâjjkuõiʹmid, mâta pueʹrrvââjjamvuuʹdid da kooʹddid. Ååʹn taarbšep aktiivlaž teâđai juâkkmõõžž da õhttsažtuâj, što oummu vuäǯǯa ääiʹjtäässʼsaž teâđaid jiõccses da âʹlddoummuid vaaikteei muttsin, Antila särnn.