Kåčč webinaaʹre: Vuäinnmõõžž säʹmmlai vuõiggâdvuõđin veʹrǧǧneǩ-kääzzkõõzzin
Veʹrǧǧneeʹǩǩ da jeärraz õõlmâsvaaldâšm toiʹmmjeei lie mõõnni iiʹjjin aktiivlânji õõuʹdääm kääzzkõõzzid še sääʹmǩiõllsaid. Koozz sääʹmǩiõllsai kääzzkõõzzi õõuʹdummuš vuâđđan? Mâiʹd lääʹjjšiõttummuž kaiʹbbai veʹrǧǧniiʹǩǩin da õõlmâs toiʹmmjeeʹjin? Na-ba koozz säʹmmlain äʹššneʹǩǩen lij vuõiggâdvuõtt? Täid kõõččmõõžžid ooccâp vaʹsttõõzzid õõutsââʹjest sääʹmteeʹǧǧ, vuõiggâdvuõttministeria da Kela jäʹrjstem Vuäinnmõõžž säʹmmlai vuõiggâdvuõđid veʹrǧǧneǩ-kääzzkõõzzin -webinaarâst.
Webinaar särnnʼjen lie halltõspiisar Pamela Sarasmo vuõiggâdvuõttministeriast da ǩiõllstaanpiisar Anne-Kirste Aikio sääʹmteeʹǧǧest. Webinaar ääʹvad spesiaalplaanni Lahja Johansen-Lampsijärvi Kelast.
Webinaar lij jurddum veʹrǧǧniiʹǩǩid da jeeʹres õõlmâsvaaldâšm toiʹmmjeeʹjid di kuälmad sektoor toiʹmmjeeʹjid mâʹte õhttõõzzid. Webinaar ǩiõll lij lääʹddǩiõll.
Webinaar tääʹvtõsân lij
- lââʹzzted fiʹttjummuž säʹmmlai ǩiõlʼlaž, sosiaalʼlaž da kulttuursaž vuõiggâdvuõđi pirr õõlmâsvaaldâšm kääzzkõõzzin
- counnâd jurddjid tõʹst, mõõk lie õõlmâsvaaldâšm õõlǥtõõzz da mõõn nalla tõk teâuddje jiiʹjjes organisaatiost.
Webinaaʹre ij taarbâž iʹlmmtõõttâd.
Äiʹǧǧ: mâ 29.10.2024 čiâss 9.00–10.00
Päiʹǩǩ: Teams
Webinaar ruõkkât. Liŋkk ruõkkma käunnai webinaar mâŋŋa sääʹmteeʹǧǧ seeidain Saamelaisten kielelliset oikeudet (Säʹmmlai ǩiõlʼlaž vuõiggâdvuõđ, samediggi.fi).
Tiõrv pueʹttem!