Kela ij teänab miõđ vuõrâs-škooultõstuärj läinntäʹǩǩõõzz ođđ määttaid påʹrǧǧmannust 2024 ääʹljeeʹl
Eeʹttiǩ-kåʹdd lij tuʹmmääm vuõrâs-škooultõstuärj loopptummšest. Lääʹǩǩmuttâz mieʹldd Kela ij teänab miõđ vuõrâs-škooultõstuärj läinntäʹǩǩõõzz påʹrǧǧmannust leʹbe mâŋŋa tõʹst aʹlǧǧi määttaid.
Eeʹttiǩ-kåʹdd lij priimâm muttsid, koid halltõs lij ouddam vuõrâs-škooultõsouddõõzzin uvddum läkka. Tän räjja päʹlǩǩvuäǯǯai leʹbe põõrǥâsneǩ lij vuäittam ooccâd vuõrâs-škooultõstuärjjõõzz Työllisyysrahasto pääiʹǩ. Vuõrâs-škooultõstuärjjõõzz vuäǯǯai mättʼtõõttjest lij leämmaž lââʹssen vuõiggâdvuõtt mättlääin riikktäʹǩǩõʹsse (lääddas), koon lij miõttâm Kela.
Lääʹǩǩmuttâz mieʹldd vuõrâs-škooultõstuärjjõõzz jeäʹt miõttu ođđ määttaid teänab 1.8.2024 ääʹljeeʹl. Tuärjjõõzz vuäitt vuäǯǯad määttaid, kook lie älggam mââimõõzzâst 31.7.2024. Tuärjjõõzz âlgg äʹlǧǧed kaggâd õuʹddel påʹrǧǧmannu 2024 da tõn vuäitt vuäǯǯad eeʹjj 2025 loopp räjja. Äiʹǧǧraaj kueʹsǩǩe še vuõrâs-škooultõõzz läinntäʹǩǩõõzz.
Eeʹjj 2023 Työllisyysrahasto maauʹsi vuõrâs-škooultõstuärjjõõzz 32518 ooumže. Vuõrâs-škooultõõzz läinntäʹǩǩõõzz Kelast vuäǯǯai leʹjje 974 ooumžed.
Mâiʹd tuärjjõõzzid vuõrâsmättʼtõõtti vuäitt juätkast vuäǯǯad Kelast?
Lääʹǩǩmuttâz mâŋŋa vuõrâsmättʼtõõtti vuäiʹtte õinn ooccâd da vuäǯǯad Kela miõttâm mätt-tuärjjõõzz. Mätt-tuärjjõʹsse koʹlle mätt-teäʹǧǧ da mättlääin riikktäʹǩǩõs.
Õllškooulmäättaid vuäitt vuäǯǯad mätt-tuärjjõõzz, jõs mättʼtõõtti ij leäkku âânnam pukid mätt-tuärjjõsmäänpõõʹjid suu ääiʹjab õllškooulmäättain.
Nuuʹbb tääʹzz määttain, ouddmiârkkân ämmtallaš mättstroiʹttel määttain, ij leäkku rajjtõs mätt-tuärjjõsmäänpõõʹjid. Mättʼtõõtti vuäitt âʹte vuäǯǯad mätt-tuärjjõõzz, håʹt son leʹčči juʹn ääiʹjben čõõđtam nuuʹbb tääʹzz tuʹtǩǩõõzz. Lââʹssen nuuʹbb tääʹzz mättʼtõõtti vuäitt vuäǯǯad Kelast škooulmäʹtǩǩtuärjjõõzz, jõs suʹst škooulmäʹtǩǩ lij kuʹǩǩ. Mättʼtõõtti ââʹǩǩ da puåtti jie vaaikât škooulmäʹtǩǩtuärjjõõzz vuäǯǯmõʹšše.
Mätt-tuärjjõõzz vuäǯǯai vuõrâsmättʼtõõtti âlgg kuuitâǥ väʹldded lokku mätt-tuärjjõõzz eeʹǩǩpuåđraajid. Puåttjid vääʹldet lokku ǩeeʹjjmieʹldd eeʹjj nuʹt, što mätt-tuärjjõõzz ij vieʹltǩani vuäǯǯ, jõs mättââtt tuâjain palddlõõžži. Kela väldd lokku eeʹǩǩpuåđraajin čõõđ mättääiʹj kalenteriiʹjji vuåǯǯum puåttjid. Õuʹddel määttai altteem-määnpââʹj da mâŋŋa valmštõõvvâm-määnpââʹj vuåǯǯum puåtti vuäiʹtte kuuitâǥ leeʹd mõõn jiânnai täättas.
Mätt-tieʹǧǧ da mättlääin riikktäʹǩǩõõzz vuäitt kuuitâǥ ooccâd. Jõs mättʼtõõttjest puåtti lie leigga šuur, vuäitt son jårrâʹstted leʹbe maaccted mätt-tieʹǧǧid, ǥu mättläinn lij kaggum.
Vuõrâsmättʼtõõtti vuäitt vuäǯǯad mättluõvâsvuõđ ääiʹjest še takai jälstemtuärjjõõzz. Jälstemtuärjjõõzzâst puåđraajin vääʹldet lokku še jeärrsi seämma poorrâmkådda kuullʼji puåttjid.