Vaaldâšmkueʹddelm

Kela leʹbe tõn tuâjjla lääʹjjvuâsttsaž, puäst leʹbe pannvueʹǩǩsõs mõõntõõllmõõžžâst vuäitt tuejjeed vaaldâšmkueʹddelm Kelaaʹje. Vaaldâšmkueʹddelm vuäitt kuõskkâd še tuâjai läʹǧstummuž tuejjeeǩâni.

Kueʹdlmin ij vueiʹt ooccâd muttâz Kela ouddõstuʹmmstõʹǩǩe

Vaaldâšmkueʹdlmin ij vueiʹt ooccâd muttâz Kela ouddõstuʹmmstõʹǩǩe. Kela ij še ǩiõttʼtõõl vaaldâšmkueʹdlmen ääʹšš, koon ǩiõttʼtõõlât leʹbe lij ǩiõttʼtõllum ouddõsäʹššen, muuttâsooccâmäʹššen leʹbe jeeʹres kueʹdlmen.

Looǥǥ lââʹzz: Ouddõstuʹmmstõõǥǥâst läittmõš

Kela ij tuʹtǩǩed vaaldâšmkueʹddelm, kååʹtt lij tuejjuum pâʹjjel 2 eeʹjj mââiårra šõddâm ääʹššest, jõs tõõzz ij leäkku jeeʹrab mäinn.

Vaaldâšmkueʹddelm tuejjummuš

Vaaldâšmkueʹddelm âlgg tuejjeed ǩeeʹrjlânji.

Vaaldâšmkueʹdlmest âlgg leeʹd

• kuõddčeei vuâđđtõõllmõš tõõzz, mõõnn diõtt mõõntõõllmõš lij kuõddčeei miõlâst puästtad

• kuõddčeei nõmm da addrõs.

Kueʹdlmest âlgg vueiʹttemvuõđi mieʹldd leeʹd še ääiʹjpodd, kuäʹss mõõntõõllmõš leʹbe läʹǧstummuš lij šõddâm.

Vaaldâšmkueʹddelm vuäitt vuõltteed pååʹšt mieʹldd leʹbe neʹttpååʹšt mieʹldd Kela ǩeeʹrjeempäikka:

• Kela, Kirjaamo, PL 450 56 Kela

• kirjaamo(a)kela.fi

Jõs vuõlttääk vaaldâšmkueʹddelm neʹttpååʹšt mieʹldd, siâzztõõllâp ââʹnned suõjjuum neʹttpååʹšt. Kela seʹlvvat ääʹšš da tooiʹmat kuõddčeeja vaaldâšmkueʹddelm ǩeeʹjjest čåuddmõõžž. Čåuddmõõžžâst jeät tuʹmmuku ni ǩeän vuõiggâdvuõđâst, ouddõõzzâst leʹbe õõlǥtõõzzâst, ij-ǥa tõõzz vueiʹt ooccâd muttâz läittmõõžžin.