Artikkâl
Návt tun adelah nube ulmui vääldi hoittáđ tuu aašijd väldikirjijn
Almostittum 12.8.2024
Väldikirjijn tun puávtáh váldásmittiđ nube ulmuu hoittáđ tuu Kela-aašijd puhelimist, palvâlemsaajeest já reiváin. Váldásmitmân lohtâseijee detaljij iberdem puáhtá leđe vaigâd kielâmuuvrâ tiet tâi veikâba tondiet, ete jieijâs kulttuurist ij lah váldásmittem. Jis ij ibbeerd váldásmittem, te äššigâs riehtitorvo sáttá hiäjusmuđ. Kela uđđâ raavâ čielgâsmit maaŋgâ sierâ kielân tom, maid váldásmittem uáivild já kiäs tom puáhtá toohâđ.
Taam váldásmittem uáivild já návt tun váldásmitáh nube ulmuu hoittáđ jieijâd aašijd
- Kela-aašijd ij lah pággu hoittáđ jieš, peic táárbu mield kiinii eres puáhtá hoittáđ taid tuu peeleest. Tađe várás kalga toohâđ väldikirje (VAL3). Teevdi väldikirje sajan 1 jieijâd tiäđuid.
- Tun puávtáh jieš valjiđ, ete kiäs tun adelah väldikirje. Sun kalga kuittâg leđe ucemustáá 18-ihásâš. Olmooš, kote ášástâl nube peeleest väldikirjijn, kočoduvvoo äššiolmožin.
- Tun meridah jieš, ete maid aašijd äššiolmooš puáhtá hoittáđ. Tun puávtáh adeliđ sunjin love hoittáđ puoh tuu aašijd teikâ tuš oovtâ ääši. Sun puáhtá ovdâmerkkân uuccâđ hiäđu tâi almottiđ nubástusâin. Sun puáhtá meid finniđ pargos hoittám várás tuu syeligâsâst toollâmnáál tiäđuid, tego tiäđuid tuu hiäđuin, ekonomâlii tiileest tâi tiervâsvuođâtiileest.
- Nube peeleest puáhtá ášástâllâđ puhelimist, palvâlemsaajeest tâi reiváin.
- Jis tun halijdah, ete äššiolmooš hoittáá tuu peeleest tuš oovtâ hiätun lohtâseijee aašijd, te čääli väldikiirján hiäđu noomâ, ovdâmerkkân aassâmtoorjâ.
- Huám.! MuuKelast ášástâllâm várás äššigâs kalga adeliđ nube ulmui Suomi.fi-váldásmittem, mon nommâ lii Sosiaaltorvo hiätuaašij hoittám (Sosiaaliturvan etuusasioiden hoitaminen). Luuvâ lase nube peeleest ášástâlmist MuuKelast.
- Tun meridah jieš meid tom, ete mon kuhháá väldikirje lii vyeimist. Tot lii vyeimist jo-uv tuáistáážân tâi tiätu peivimere räi. Tun puávtáh kuás peri meid mutteđ väldikirje vyeimistorroom tâi keessiđ maassâd tuu adelem váldásmittem almootmáin Kelan. Tun jieh taarbâš muštâliđ suujâ maassâdkesimân.
- Tuu vuáláčaalâ väldikirjeest visásmit tom, ete tun lah jieš adelâm váldásmittem.
Väldikirje adeleijen tun puávtáh toimâttiđ väldikirje MuuKelast, poostâ peht tâi palvâlemsajan. Äššiolmooš puáhtá toimâttiđ väldikirje poostâ peht tâi palvâlemsajan.
Raavâ väldikirjeluámáttuv tevdimân jieškote-uv kielân
- Anarâškielân: Nube peeleest ášástâllâm – Raavâ väldikirjeluámáttuv tevdimân (pdf)
- Tavesämikielân: Nuppi beales áššiid dikšun – Ráva váldegirjeskovi deavdimii (pdf)
- Nuorttâlâškielân: Nuuʹbb oummu peäʹlest äʹššummuž – Vuäʹpstõs väʹlddǩeʹrjjlomaakk teâuddmõʹšše (pdf)
- Suomâkielân: Toisen puolesta asiointi – Ohje valtakirjalomakkeen täyttämiseen (pdf)
- Ruotâkielân: Sköta ärenden för en annan person – Anvisningar om hur fullmaktsblanketten ska fyllas i (pdf)