Hoittáá Kela-aašijd oornigân ääigild ovdil juovlâi – paseh vaigutteh torjui mäksimân
Kela-aašijd kannat hoittáđ ääigild oornigân, ko juovlâi já ivemolsom paseh vaigutteh äššigâspalvâlem ávusorroomaigijd já meid torjui uuccâmaigijd já máksupeivijd. Masa puoh Kela-aašijd puáhtá hoittáđ MuuKelast.
Ivemolsom já ive vuossâmuuh ohoh láá Kelast távjá huápuliih. Kela-aašijd kannat-uv pieijâđ oornigân puorijn aaigijn ovdil juovlâi, tastko poosijn Kela palvâlemsajeh já puhelinpalvâlus láá kiddâ. Uđđâvuođááptu mij palvâlep äššigâsâid tme 13 räi, já áigápuátutorjuu kocceem lii áávus tme 16 räi. Juovlah meid toledeh pargottesvuotâtorjuu almottem- já máksupeeivijd, já juovlâmáánu áigápuátutorjuu kiergân tilin ovdil juovlâi, jis ucâmuš já lahtoseh láá toimâttum Kelan majemustáá 10.12.2024.
Tun puávtáh hoittáđ iänááš Kela-aasijd MuuKelast: uuccâđ torjuid, vuolgâttiđ lahtosijd já almottiđ nubástusâin. MuuKelast tun puávtáh meid tärhistiđ jieijâd ucâmuš tile já hiäđui máksupeeivijd.
Kela chatrooboot (suomâ- teikâ ruotâkielân) palvâl pirrâmpeeivi kela.fi-nettisiijđoin já MuuKelast. Chatrooboot vievâst tun finniih jotelávt já älkkeht ravvuid torjui uuccâm puoh muddoin.
Äššigâspalvâlem ávusorroomääigih juovlâi já ivemolsomist.
Kela puhelinpalvâlus já palvâlemsajeh láá kiddâ juovlâi 24.–26.12., uđđâvuođpeeivi 1.1. sehe luáppijái 6.1.
Uđđâvuođááptu 30.12. Kela puhelinpalvâlus lii áávus tme 9–13 já áigápuátutorjuu kocceem tme 16 räi. Tun kaavnah Kela palvâlemnumerijd čujottâsâst www.kela.fi/soita-kelaan (suomâkielân). Jis tun tarbâšah palvâlem sämikielân, te kyeđe ohtâvuotâväldimtáttum šleđgâpostáin čujottâsân saame@kela.fi.
Uđđâvuođááptu áávus orroo palvâlemsajeh maneh kiddâ majemustáá tme 13, mutâ uási kocá huápulii áigápuátutorjuu tarbâšeijei várás tme 16 räi. Koccee palvâlemsajeh láá čuávuvááh:
- Helsig, Kamppi
- Hämeenlinna
- Joensuu
- Jyväskylä
- Kajaani
- Kokkola
- Kotka
- Kuopio
- Lahti
- Lappeenranta
- Oulu
- Pori
- Ruávinjargâ
- Seinäjoki
- Tampere
- Turku
- Vaasa
Täärhist puoh palvâlemsoojij ávusorroomaaigijd já kollimčujottâsâid čujottâsâst www.kela.fi/palvelupisteet (suomâkielân).
Almoot pargottesvuotâpeeivijd ääigild
Juovlah toledeh pargottesvuotâääigi almottempeeivijd já pargottesvuotâtorjuu máksupeeivijd. Tun uáináh MuuKelast teikâ tuu finnim almottâsluámáttuvâst peeivi, kuás tun puávtáh kyeđđiđ jieijâd almottâs.
Jis pargottesvuotâääigi almottâs paje nohá 19.–23.12.2024
- almottâs puáhtá macâttiđ 19.12.2024
- ruuđah láá tilist tolemužžân 23.12.2024.
Jis pargottesvuotâääigi almottâs paje nohá 24.12.2024
- almottâs puáhtá macâttiđ 20.12.2024
- ruuđah láá tilist tolemužžân 27.12.2024.
Jis pargottesvuotâääigi almottâs paje nohá 25.12.2024
- almottâs puáhtá macâttiđ 23.12.2024
- ruuđah láá tilist tolemužžân 30.12.2024.
Almottâs kannat toimâttiđ MuuKelast jo macâttempeeivi iđedist, vâi kiergânep kieđâvuššâđ tom nuuvt jotelávt ko máhđulâš.
Uusâ áigápuátutorjuu ääigild
Áigápuátutorjuu majemuš máksupeivi ovdil juovlâi lii 23.12.2024. Toorjâ kiergân talle tilin, jis ucâmuš já puoh tárbuliih lahtoseh láá toimâttum Kelan majemustáá 10.12.2024.
Jis tun tarbâšah áigápuátutorjuu huápulávt, te vääldi ohtâvuođâ Kela palvâlemsajan teikâ palvâlemnumerân 020 692 207. Huápulâš tile puáhtá leđe ovdâmerkkân kivkked šoddâm tárbu máksučonnâsmân talkkâsij teikâ purrâmuškáálvui várás.
Jis tun tarbâšah áigápuátutorjuu huápulávt Kela ávusorroomaaigij ulguubeln, te pyereestvaijeemkuávlu sosiaalpalvâlus puáhtá kuorâttâllâm mield mieđettiđ estâdeijee áigápuátutorjuu. Aakuut kriisâtiileest juovlâpoosij ääigi tun puávtáh leđe ohtâvuođâst pyereestvaijeemkuávlu sosiaalkocemân.
Nubástusah hiäđoid já viärukoortâi vyeimistorroomááigán ive 2025
Kela hiäđui meerijd já iävttoid puátih puáttee ive maaŋgah nubástusah. Motomeh nubástusah láá jo tuhhiittum ovdâskoddeest, mutâ uási lahânubástusâin lii eskân puátimin ovdâskode kieđâvušmân. Nettisiijđoin www.kela.fi/nubastusah tun kaavnah tiäđuid sierâ hiäđui nubástusâin, moh láá jo tuhhiittum teikâ vuávámnáál.
Kannat meid väldiđ vuotân, ete ive 2025 rääjist viärukoortah puátih vuáimán tállân uđđâivemáánu aalgâst. Ovdil viärukoortah pottii vuáimán eskân kuovâmáánust. Kela finnee ive 2025 muneviärutiäđuid automaatlávt Viäruhaldâttuvâst, te tun jieh taarbâš toimâttiđ viärukoortâ Kelan. Jis tun halijdah mutteđ tuu muneviäruprooseent, te tun puávtáh tiiláđ uđđâ viärukoortâ OmaVerost.
Mij tuáivuttep äššigâsâidân puorijd juovlâid já luholii uđđâ ive 2025!
Luuvâ lase