Kela muštâl váldásmitmist maaŋgâ kielân

Jis äššigâs ij paste jieš hoittáđ Kela-ašijdis, te sun puáhtá váldásmittiđ paargon nube ulmuu. Kela uđđâ raavâ muštâl maaŋgâ sierâ kielân, ete maid váldásmittem uáivild já maht tot tahhoo.

Kela-aašijd ij lah pággu hoittáđ jieš, peic táárbu mield kiinii eres puáhtá hoittáđ taid äššigâs peeleest: ovdâmerkkân pelikyeimi, vaanhim, pärni tâi ustev. Váldásmitmân lohtâseijee detaljij iberdem puáhtá leđe vaigâd ovdâmerkkân kielâmuuvrâ keežild tâi tondiet, ete váldásmittem lii tuávádâhhân vieres. Kela uđđâ raavâ čielgâsmit 14 sierâ kielân tom, maid váldásmittem meerhâš já kiäs tom puáhtá toohâđ.

Kela haalijd uđđâ ravvuin visásmittiđ, ete meid eidu enâmân varrim äššigâs ibbeerd jieijâs vuoigâdvuođâid jiešmerideijee tuáimen.

– Äššigâspalvâlmist láá puáttám oovdân tileh, main lii ravkkâm huolâ äššigâs riehtitorvo olášuumeest já syemmilii ohtsâškode täsiviärdásii toimâm ibbeerdmist. Uđđâ ravvuu vievâst lii tárguttâs išediđ äššigâs iberdiđ, maid váldásmittem uáivild. Raavâ muštâl čielgâsávt meid tom, ete kiäs väldikirje puáhtá adeliđ já maid aašijd nube ulmuu peeleest puáhtá hoittáđ, ovdedem äššitobdee Päivi Nyberg äššigâsohtâduvâst paahud.

Kela movtijdit kirjálii váldásmitmân

Váldásmittem puáhtá adeliđ meid njálmálávt, mutâ tot tuáimá tuš kerdiluándulávt. Kirjálâš váldásmittem vuod lii vyeimist tuáistáážân. Kela movtijdit kirjálii váldásmitmân, tastko kirjálâš väldikirje, mii kávnoo äššigâs tiäđuin, taha sehe äššigâs já suu váldásmittem ulmuu ášástâllâm älkkeebin. Siämmást tot meid čielgâsmit Kela äššitobdei pargo.

Kelast lii valmâš väldikirjeluámáttâh Väldikirje – Hiätuaašij hoittám Kelast (VAL 3smn) váldásmittem addelmân.

Äššigâs meerrid jieš, ete maid aašijd väldikirjijn puáhtá hoittáđ. Nube ulmui puáhtá adeliđ love hoittáđ puoh hiätuaašijd tâi tuš tiätuhiäđu tâi -ääši. Tilinummeer nubásmittem várás kalga ain toohâđ sierâ väldikirje. Väldikirje haldâšeijest lii vuoigâdvuotâ finniđ aašij hoittám várás velttidmettum syeligâsâst toollâmnáál tiäđuid, jis väldikirjeest lii adelum mietâmâš tiäđui addelmân.

Väldikirje puáhtá toohâđ meid rijjâhámásávt, ko peri tot ana sistees puoh tárbulijd tiäđuid já váldásmittee ulmuu jieijâs kieđáin čallum vuáláčalluu. Váldásmittem finnejeijee kalga leđe olesahasâš. Väldikirje puáhtá toimâttiđ Kelan OmaKelast, poostâ peht tâi palvâlemsajan.

Nube peeleest ij pyevti tuáistáážân toohâđ tâi vuolgâttiđ ucâmušâid neetist. Oovtâstpargokyeimih já pargoadeleijeeh pelestis ášástâleh Kelast Suomi.fi-váldásmitmijn.

Luuvâ lase

Raavâ Kela väldikirjeluámáttuv tevdimân jieškote-uv kielân