Kela torjuuh pargottes ulmui
Pargottesvuotâ vyeleed puáđuid. Tun puávtáh finniđ pargottesvuotâtorjuu Kelast, jis tust ij lah pargosaje jiehke tun finnii pargottesvuotâtorjuu eres soojijn.
Kela torjuuh pargottesvuotâááigán láá
- pargottesvuotâpeiviruttâ
- pargomarkkântoorjâ.
Pargottesvuotâtorjuuh máksojeh ulmuid, kiäh ääsih fastâ Suomâst. Sii lasseen pargottesvuotâtorjuuh máksojeh EU-enâmijn puáttám ulmuid, kiäh láá majemustáá porgâm Suomâst.
Täärhist meid, ete puávtáh-uv finniđ eres torjuid, ovdâmerkkân aassâmtorjuu.
Jis tun páásáh pargotteemmin
Jis tun páásáh pargottemmin, te almottât tállân pargo-occen jieijâd päikkikieldâ pargolâšvuotâpalvâlussáid (tyomarkkinatori.fi, suomâkielân).
Tun puávtáh finniđ pargottesvuotâtorjuu tuš ääigist, kuás tun lah pargo-occen jieijâd päikkikieldâ pargolâšvuotâpalvâlusâin. Pargolâšvuotâpalvâlusah meid adeleh Kelan ciälkkámuš tast, puáhtá-uv tunjin mäksiđ torjuu.
Tun koolgah meid väldiđ vuástá fallum pargo tâi škovlim. Jis tast piettâl sujâittáá, te puáhtá monâttiđ torjuid.
Mušte anneeđ jieijâd pargouuccâm vyeimist. Tun finniih toos tärhibijd ravvuid pargolâšvuotâpalvâlusâin.
Návt tun ášástâlah pargolâšvuotâpalvâlusâiguin
Pargottemij pargouuccâmpalvâlusah muttojeh 1.1.2025. PI-toimâttuvah jaskeh, já sajan puátih kieldâi pargolâšvuotâpalvâlusah.
Tun puávtáh ain hoittáđ jieijâd aašijd Työmarkkinatori-siijđoin (tyomarkkinatori.fi, suomâkielân).
Tun kaavnah jieijâd päikkikieldâ pargolâšvuotâpalvâlusâi ohtâvuotâtiäđuid čujottâsâst tyomarkkinatori.fi/aluesivu (suomâkielân).
Nubástustorvoruttâ paijeel 55-ihásáid
Nubástustorvoruttâ lii toorjâ, mon tun puávtáh finniđ Kelast tâi pargottesvuotâkassaast, jis tun lah celkkum luovâs jieijâs pargoost. Nubástustorvoruuđâ meeri lii siämmáš ko suulân oovtâ mánuppaje pälkki.
Tun puávtáh finniđ nubástustorvoruuđâ, jis puoh taah iävtuh olášuveh:
- Tun lah tiävdám 55 ihheed.
- Tun lah celkkum luovâs jieijâs pargosaajeest puovtâdâslij já ekonomâlij suujâi tiet.
- Tun lah porgâm siämmáá pargosaajeest ucemustáá 5 ive.
Jis tun kuulah pargottesvuotâkaasan, te uusâ nubástustorvoruuđâ jieijâd pargottesvuotâkassaast. Jis tun jieh kuulâ pargottesvuotâkaasan, te uusâ nubástustorvoruuđâ Kelast.
Pargottesvuotâääigi almottâs
Jis pargottesvuotâäigi juátkoo, te tun koolgah toimâttiđ Kelan pargottesvuotâááigán kyeskee almottâs 4 oho kooskâi. Kela máksá tunjin torjuu tuu almottâs vuáđuld.
Pargottesvuotâääigi almottâs tun puávtáh rähtiđ viermist tâi luámáttuvâiguin, maid tun puávtáh printtiđ Kela nettisiijđoin tâi uuccâđ Kela toimâttuvâin.
Merkkii almottâsân, moh peeivih tun lah lamaš pargottem já moh peeivih lah uásálistám pargo finnim pyeredeijee palvâlusân.
Jis tun lah pargottesvuotâääigi lamaš tyellittälli pargoost, te merkkii almottâsân, ete mon peeivi tun lah lamaš pargoost.