Pargottesvuotâpeiviruttâ

Pargottesvuotâpeiviruttâ puáhtá leđe tienâspeiviruttâ tâi vuáđupeiviruttâ.

Tienâspeiviruttâ

Pargottesvuotâkassa rekinist tienâspeiviruuđâ mere tienâsij ađai puáđui mield. Puávtáh finniđ tienâspeiviruuđâ, jis kuulah pargottesvuotâkaasan. Ovdâmerkkân sierâ áámmátsuorgijn láá távjá jieijâs pargottesvuotâkasah. Láá meiddei pargottesvuotâkasah, moid puáhtá kuullâđ kii peri.

Kela ij määvsi ánsupeiviruuđâ, ige tom pyevti uuccâđ Kelast.

Pargottesvuotâkassa máksá ánsupeiviruuđâ, jis tun lah kuullâm pargottesvuotâkaasan tuárvi kuhháá já pargoost orroom iähtu olášuvá. Pargoost orroom iävtu olášume uáivild tom, ete tun lah lamaš tuárvi kuhháá pargoost ovdil ko lah pááccám pargottemmin.

Tienâspeiviruuđâ puáhtá finniđ enâmustáá 400 peivid. Jis tun lah lamaš pargoost vuálá 3 ive, te tun puávtáh finniđ tienâspeiviruuđâ enâmustáá 300 peivid.

Koijâd lasetiäđuid tienâspeiviruuđâst tuu jieijâd pargottesvuotâkassaast tâi Pargottesvuotâkasai ohtsâšseervist (Työttömyyskassojen yhteisjärjestö, tyj.fi, suomâkielân).

Vuáđupeiviruttâ

Jis tun jieh lah pargottesvuotâkasa jeessân jiehke finnii tienâspeiviruuđâ, te Kela máksá tunjin vuáđupeiviruuđâ. Ton puáhtá finniđ enâmustáá 400 peivid. Jis tun lah lamaš pargoost vuálá 3 ive, tun puávtáh finniđ vuáđupeiviruuđâ enâmustáá 300 peivid.

Vuáđupeiviruuđâ finniimân láá raijiittâsah, jis tun lah vuálá 25-ihásâš.

Luuvâ lase vuáđupeiviruuđâ ucâmist (suomâkielân).

Mon ennuv vuáđupeiviruuđâ finnee?

Vuáđupeiviruttâ lii 37,21 eurod peeivist, já tun finniih tom 5 peeivist ohhoost.

Tun máávsáh vuáđupeiviruuđâst viäruid.

Tun puávtáh rekinistiđ Kela nettisiijđoin, ete mon ennuv tun finniih ​​​vuáđupeiviruuđâ (suomâkielân).

Pargoost orroom iähtu

Vâi tun finniih vuáđupeiviruuđâ, te tust kalga olášuđ pargoost orroom iähtu. Pargoost orroom iähtu čoggâšuvá

• ohtâ mánuppaje, jis tun lah finnim mánuppaje ääigi päälhi ucemustáá 930 eurod
• mánuppajepeeli, jis tun lah finnim mánuppaje ääigi päälhi ucemustáá 465 mutâ vuálá 930 eurod.

Tuu puotâ pargoostorroomiähtu olášuvá, ko taah pargoostorroommánuppajeh láá čoggâšum ohtsis 12 majemui 28 mánuppaje ääigi.

Meid porgâm monnii eres EU- tâi Eta-staatâst tâi Sveitsist puáhtá rekinistiđ mieldi.

Pargoost orroom iähtun puáhtá rekinistiđ mieldi pargo meid kuhheeb ääigist ko 28 mánuppaajeest ovdâmerkkân talle, jis:

• tun lah puáccám
• tun lah jottáám uápuid
• tun lah tipšom vuálá 3-ihásii párnád
• tun lah uásálistám PI-toimâttuvváin soppum tooimân.

Irâtteijest lii jieijâs pargoost orroom iähtu. Jis tun lah irâtteijee, te täärhist vuáđupeiviruuđâ iävtuid Kelast.

Pargotteemmin olgoenâmijn

Tun puávtáh finniđ pargottesvuotâpeiviruuđâ motomijn tábáhtusâin meid talle, ko tun lah olgoenâmijn já tun uusah tobbeen pargo.

Tun puávtáh koijâdiđ lase palvâlemnumerist 020 692 210.