Ǩieʹss põhtt muttsid Kela kääzzkõspaaiʹǩi äävaiåårramaaiʹjid
Ǩeässa še Kela aaʹššid kaʹnnat håiddad OmaKelast leʹbe sååiteeʹl teʹlfonkääzzkõʹsse. Määŋgain Kela kääzzkõspaaiʹǩin äävaiåårramääiʹj mottje ǩieʹzz ääiǥas.
Kela kääzzkõspaaiʹǩi äävaiåårramääiʹj mottje ǩieʹzz ääiǥas. Ǩieʹssäävaiåårramääiʹj šâʹdde viõʹǩǩe juõkkumnalla ǩieʹssmannust ääʹljeeʹl da mottje âʹpet takainallšem maʹlle mââimõõzzâst 30.9.2024.
Ääiʹjtässʼsaž äävaiåårramaaiʹjid käʹnnat taʹrǩsted addrõõzzâst www.kela.fi/palvelupisteet (lääddas). Vuäitak ǩiõččâd še pååđliist Kela kääzzkõspaaiʹǩi äävaiåårramaaiʹjin ǩeässa 2024 (pdf).
Aanar kääzzkõspäiʹǩǩ (Petsamontie 3, 99800 Ivalo) lij kõskkpoddsânji ǩidd 1.7.2024–31.8.2024.
Kela-aaʹššid vuäitak håiddad hieʹlǩeld neeʹttest da teʹlfoonâst
Vuäitak håiddad määŋgaid Kela-aaʹššid neeʹttest: vuäitak ouddmiârkkân ooccâd ouddõõzzid, taʹrǩsted tuʹmmstõõǥǥ, vueiʹnned kuäʹss ouddõõzz määuʹset, tååimted meâlddõõzzid da vuõltteed Kelaaʹje saaǥǥid. Kela neʹttseeidain chatrobott vuäʹppast čõõđ suutk jeäʹrbi mieʹldd piʹrǧǧeemtuärjjõʹsse, takai jälstemtuärjjõʹsse, mättʼtõõđji tuärjjõõzzid di piârouddõõzzid kuõskki aaʹššin. Kela kääzzkâstt äʹššniiʹǩǩid Facebookâst da Instagraamâst.
Jõs jiijjad äšša jiõk kaaun vasttõõzz neeʹttest, vuäitak soiʹttjed Kela teʹlfonkääzzkõʹsse. Teʹlfonkääzzkõs lij še ǩeässa äävai vuõssaarǥâst piâtnca čiâss 9–16. Evvanpeiʹvvkäänan 21.6. teʹlfonkääzzkõs lij ǩidd. Teʹlfoonâst vuäitak håiddad seämma persoonlaž aaʹššid ǥu kääzzkõspääiʹǩest.
Sääʹmǩiõllsaž kääzzkõõzz ǩieʹsspââʹjest
Kela nuõrttsääʹmǩiõllsaž teʹlfonkääzzkõs lij äävai neljdpeiʹvven čiâss 9–11 nââmrest 020 634 4795 (ǩidd 17.6.–5.7. da 29.7.–9.8.2024). Tâʹvvsääʹmǩiõllsaž teʹlfonkääzzkõs lij meäʹrteʹmes ääiʹj ǩidd.
Sääʹmǩiõllsaž äʹššneeʹǩǩ vueiʹtte kueʹđđed še õhttvuõttväʹlddemraukkmõõžž neʹttpååʹšt mieʹldd saame@kela.fi.
Mäʹhtt hååidam Kela-aaʹššid, jõs ââldmõs kääzzkõspäiʹǩǩ lij ǩidd?
Jos jiõk vueiʹt håiddad jiijjad aaʹššid neeʹttest leʹbe teʹlfoonâst da ââldmõs Kela kääzzkõspäiʹǩǩ lij ǩidd, vuäitak vuäǯǯad vieʹǩǩ Kela-aaʹššid še jeeʹresåʹrnn. Määŋgast päiʹǩǩ-kååʹddest lij veʹrǧǧniiʹǩǩi õhttsaž äʹššeempäiʹǩǩ, koʹst vuäʹpstet takai tääʹzzest Kela-aaʹššin. Kela-aaʹššid vuäǯǯ vuäʹpstõõzzid še määŋgain Ohjjeempaaiʹǩin, âʹldd åårrai ålggkaaupšempaaiʹǩin da kääzzkâʹsttemkõõskõõzzin. Lââʹssen määŋgain päiʹǩǩ-kooʹddin lij Kela ougglõskääzzkõs, koon pääiʹǩ vuäǯǯak Kela tuâjjliʹžže vueiʹnnem- da jiõnnõhttvuõđ. Ougglõskääzzkõs vaʹsttad kääzzkõõzz Kela jiijjâs kääzzkõspääiʹǩest.
Põʹmmaipååʹšt vuäitt vuõltteed Kela, PL 10, 00056 KELA.