Tuärjjõs puõʒlmin jeällmõʹšše
Säursmâʹttem- da šiõttlõõvvâmvalmštâʹttemkuurs vieʹǩǩte tuu jieʹlled pueʹrr jieʹllem puõʒlmest huõlǩâni.
Jos tuʹst puõʒʒâlm leʹbe vââʹǩǩ lij čuuʹt vaiggâd, tuʹnne vuäitt suåppâd väʹǯǯlõs tälkkmallaš säursmâttmõš leʹbe määŋgämmtallaš oummumeâldlaž säursmâttmõš.
Säursmâʹttem- da šiõttlõõvvâmvalmštâʹttemkuurs
Kela jääʹrjast säursmâʹttem- da šiõttlõõvvâmvalmštâʹttemkuursid päärnaid, nuõrid da vuõrâsoummid, koin lij puõʒʒâlm leʹbe vââʹǩǩ. Kuursin vuäǯǯak teâđ puõʒlmastad, verddsõstuärj da tuärj aarǥâst piʹrǧǧummša.
Looǥǥ lââʹzz säursmâʹttem- da šiõttloõõvvâmvalmštâʹttemkuursin (lääddas).
Määŋgämmtallaš säursmâttmõš
Jos puõʒlmad vaigsmâtt jiânnai jieʹllmad, tuʹst vuäitt leeʹd vuõiggâdvuõtt määŋgämmtallaš oummumeâldlaž säursmâttma. Määŋgämmtallaš oummumeâldlaž säursmâttmõõžžâst vuäǯǯak vieʹǩǩ määŋg äʹšštobddjest.
Säursmâttmõõžž täävtõsân lij vieʹǩǩted tuu piʹrǧǧeed aarǥâst, reâuǥast da määttain. Säursmâttmõõžžâst vueʹzz vueiʹtet jäʹrjsted jooukâst.
Väʹǯǯlõs tälkkmallaš säursmâttmõš
Vuäitak ooccâd väʹǯǯlõs tälkkmallaš säursmâttmõõžž, jos puk täk määin teâuddje:
- Leäk vuâlla 65-âkksaž.
- Tuʹst lie puõʒʒâlm leʹbe vââʹjj diõtt šuur vaiggâdvuõđ piʹrǧǧeed aarǥâst.
- Tuʹst lij säursmâʹttemplaan, kååʹtt lij rajjum õõlmâs tiõrvâsvuõtthuâlast.
Väʹǯǯlõs tälkkmallaš säursmâttmõš vuäitt leeʹd õuddmiârkkân
- psykoterapia
- fysioterapia
- toiʹmmjemterapia
- särnnamterapia.
Säursmâttmõš vuäitt leeʹd oummumeâldlaž terapia leʹbe joukkterapia. Terapia vuäitt vuäǯǯad seämma vuâra 1–3 eeʹǩǩed.
Väʹǯǯlõs tälkkmallaš säursmâttmõš vuäitt leeʹd še säursmâʹttem- leʹbe šiõttlõõvvâmvalmštâʹttemkurss leʹbe määŋgämmtallaš oummumeâldlaž säursmâttmõš.