Vuõiggâdvuõtt Kela tuärjjõõzzid ålggjânnmin
Jõs tuʹst lij vuõiggâdvuõtt Lääʹddjânnam sosiaalstaaʹne, vuäitak vuäǯǯad takainalla seämma tuärjjõõzzid, koid vuäǯǯčiǩ Lääʹddjânnmest. Ålggjânnmid vueiʹtet mäʹhssed ouddmiârkkân päärnažlââʹzz, jeäʹnnveäʹǩǩvuõđ da jeeʹres päʹrnnpiârrji tuärjjõõzzid.
Pukid Kela tuärjjõõzzid jeät kuuitâǥ mahssu ålggjânnmid.
Jeältõõǥǥi mäʹhssem ålggjânnmid
Jõs vuäǯǯak jeältõõǥǥ da seerdak põõššjen ålggjânnmid, Kela kõskklâtt tuu jeältõõǥǥ mähssmõõžž serddmõõžž seuʹrrjeei määnpââʹj aalǥâst. Jõs seerdak sosiaalstaansuåppmõšjânnma, jeältõõǥǥ mähssmõš vuäitt juätkkjed. Staanjeältõõǥǥ ij kuuitâǥ vueiʹt vuäǯǯad ni sosiaalstaansuåppmõšjânnmid.
Kela ij määuʹs meerjeältõõǥǥ EU-jânnmid, Eta-jânnmid, Sveiʹccjânnma ij-ǥa Jõnn-Britanniaaʹje 1.2.2025 mâŋŋa. Tät šâdd tõʹst, što lääʹǩǩ lij mottjam. Muuttâs ij kuõsk piârjeältõõǥǥid ij-ǥa reâuggjeältõõǥǥid. Reâuggjeältõõǥǥid mäʹhsse reâuggjeältõkstroiʹttel.
Kõõjj Kela kääzzkõsnââmrest, mõõnn nalla ålggjânnmid serddmõš vaaikat jiijjad jeältõõǥǥ mähssmõʹšše: 020 634 0200.
Ouddmiârkk: Eestijânnma jeältõkvuäǯǯjen
Naʹzvaanâž Mäʹrjj da Riitta seʹrdde Eestijânnma. Mäʹrjj vuäǯǯ Kelast reâuggpââʹstʼteʹmesvuõttjeältõõǥǥ. Riitta vuäǯǯ Kelast liâskjeältõõǥǥ.
Määʹrj reâuggpââʹstʼteʹmesvuõttjeältõõǥǥ mähssmõš kõskklââvv serddmõõžž seuʹrrjeei määnpââʹj aalǥâst. Riitta liâskjeältõõǥǥ mähssmõš juätkkai.
Ouddmiârkk: Turkkjânnma riõuggu
Åʹsǩǩ serdd 5 määnpââjas riõuggu Turkkjânnma. Suʹst piâr serdd mieʹldd. Ååʹsǩest da suu piârrjest seill vuõiggâdvuõtt Kela tuärjjõõzzid, ǥu åårummuš ålggjânnmin peštt vuâlla 6 määnpââʹj. Seeʹst lij vuõiggâdvuõtt tõid Kela tuärjjõõzzid, koid vueiʹtet mäʹhssed ålggjânnmid. Ålggjânnmid jeät mahssu ouddmiârkkân takai jälstemtuärjjõõzz leʹbe päärnai dommhååid tuärjjõõzz.
Jõs Ååʹsǩ piâr seerdči Turkkjânnma põõššjen, sij vuõiggâdvuõđ Kela tuärjjõõzzid puuđči seʹrddempoʹdde.
Euroopplaž puõccihåiddkortt
Vuäitak tiʹllʼjed Kelast euroopplaž puõccihåiddkoort. Kortt lij määustem. Ko tuʹst lij kortt, vuäǯǯak hååid kroota puâccjummša EU-jânnmest, Etv-jânnmest, Sveiʹccjânnmest da Jõnn-Britanniast seämma hõõʹddin ko pääiklaž oummu.
Vuäitak tiʹllʼjed koort neeʹttest. Neeʹttest vuäitak tiʹllʼjed koort tuu päärnže še.
Vuäitak še tiʹllʼjed koort kääzzkõsnââmrest 020 692 204.
Jõs tuʹst ij teänab leäkku vuõiggâdvuõtt Kela tuärjjõõzzid, jiõk vueiʹt ââʹnned euroopplaž puõccihåiddkoort.