Vearjogeatnegasa doarjagat
Vearjogeatnegasvuođa čađaheapmi oaivvilda dan, ahte olmmoš manná soahtevehkii dahje siviilabálvalussii.
Oaččut dalle soahteveagas dahje siviilabálvalusbáikkistat smávva beaiveruđa.
Dan lassin Kela sáhttá máksit soalddátdoarjaga. Dat sáhttá máksojuvvot olbmui, gii lea soahteveagas dahje siviilabálvalusas, dahje su oapmahaččaide. Oapmahaš oaivvilda vearjogeatnegasa náittosguoimmi. Oapmahaš lea maiddái rabasguoibmi, geainna vearjogeatnegasas lea oktasaš mánná. Dan lassin oapmahaččat leat vearjogeatnegasa iežas mánát ja náittosguoimmi mánát.
Kela sáhttá máksit soalddátdoarjaga maiddái dakkár olbmui, gii boahtá olgoriikkain Supmii bálvalussii.
Soalddátdoarjagii gullet
- vuođđodoarjja
- ássandoarjja
- ealihandoarjja
- sierradoarjja.
Lassin Kela sáhttá máksit oahppoloana reanttuid.
Soalddátveahki sáhttet oažžut
- vearjogeatnegas
- náittosguoibmi
- ovttasorru, jos beallelaččain lea oktasaš mánná
- vearjogeatnegasa mánná dahje náittosguoimmi mánná.
Loga lasi soalddátdoarjaga ohcamis (suomagillii).
Boađuid váikkuhus soalddátdoarjagii
Soalddátdoarjagii váikkuhit boađut, maid don ja du oapmahaš oažžubeahtti bálvalusa áigge. Kela vuhtiiváldá dalle nettoboađuid. Nettoboađut dárkkuhit boađuid, main leat máksojuvvon vearut. Nettoboađut geahpeduvvojit soalddátdoarjagis.
Boađuide ii goittotge rehkenasto beaiveruhta, man oaččut soahteveagas dahje siviilabálvalusbáikkis. Dan lassin sáhtát dinet juohke mánotbaji 300 euro almmá, ahte dat geahpeda soalddátdoarjaga meari. Dát gohčoduvvo suodjeoassin.
Vuođđodoarjja
Kela sáhttá máksit vearjogeatnegasa oapmahažžii vuođđodoarjaga. Vuođđodoarjja gokčá beallelačča ja máná beaivválaš goluid, maidda eará boađut eai reahkká. Dat leat ovdamearkka dihte borramuššii, biktasiidda ja dearvvasvuođafuolahussii laktáseaddji golut.
Vuođđodoarjaga dievas mearri lea sulaid 775 euro mánotbajis. Doarjaga mearrái váikkuhit bearraša boađut ja mánnálohku.
Ássandoarjja
Kela sáhttá máksit vearjogeatnegasa ja su oapmahačča govttolaš ássangoluid.
Kela sáhttá mieđihit ássandoarjaga vearjogeatnegassii dušše dalle, jos son lea ássan iehčanassii sulaid 3 mánotbaji áigge ovdal bálvalusa. Jos vearjogeatnegasas lea ovdamearkan oamastanvisti, maiddái oanehut ássanáigi reahkká.
Ássangoluide rehkenastojuvvojit láigu, čáhcemávssut, šleađgamávssut, vástta, visteloana reanttut ja bearašviesu dikšungolut.
Ealihandoarjja
Jos vearjogeatnegas ii bastte máksit mánnái ealihanveahki, Kela sáhttá máksit ealihandoarjaga soahteveaga dahje siviilabálvalusa áigge.
Sierradoarjja ja oahppoloana reanttut
Kela sáhttá máksit vearjogeatnegasa oapmahažžii ovdamearkka dihte dearvvasvuođadikšumii dahje mánáiddikšumii laktáseaddji goluid. Dat gohččoduvvo sierradoarjjan.
Kela sáhttá maiddái máksit vearjogeatnegasa ja su oapmahačča oahppoloana reanttuid.
Eará doarjagat
Jos vearjogeatnegas oažžu máná, son sáhttá oažžut vánhemiidbeaiveruđaid.
Jos it sáhte oažžut soalddátdoarjaga, dus sáhttá leat vuoigatvuohta oažžut almmolaš ássandoarjaga. Dárkkis ášši Kelas.