Maht puáđuh vaigutteh uápputorjui?
Tust uážžuh leđe puáđuh siämmást, ko finniih uápputorjuu. Puáđoid lii kuittâg rääji, mii kočoduvvoo ihepuáturääijin. Jis tun finniih ive ääigi eenâb puáđuid, puáđuh vaigutteh tuu uápputorjuu miärán.
| Toorjâmánuppajeh kalenderive ääigi | Ihepuáturääji, eurod/kalenderihe |
|---|---|
| 1 | 35 360 |
| 2 | 33 280 |
| 3 | 31 200 |
| 4 | 29 120 |
| 5 | 27 040 |
| 6 | 24 960 |
| 7 | 22 880 |
| 8 | 20 800 |
| 9 | 18 720 |
| 10 | 16 640 |
| 11 | 14 560 |
| 12 | 12 480 |
Jis tun algâttah uápuid tâi valmâštuuh kaskoo ive, tun puávtáh ánsášiđ rijjâ puáđuid ovdil tuu uápui älgim já valmâštum maŋa. Tarkkuu kuittâg puáturaajijd uáppumánuppoojij ääigi. Huolât tast, ete tust láá puáđuh uápui ääigi enâmustáá 1 040 eurod mánuppaajeest toorjâmánuppaje kuáttá já 3 120 eurod mánuppaajeest torjuuttes mánuppaje kuáttá.
Kela puáhtá táttuđ tuu čielgâdiđ, ete kuás tun lah finnim tuu puáđuid.
Jis tun koskâlditáh tuu uápuid kaskoo ive, te tuu puáđuh váldojeh huámmášumán oles ivveest.
Luuvâ lase tast, maht puáđuh vaigutteh uápputorjui (suomâkielân).
Jis puáđuh maneh paijeel ihepuáturääji
Tun koolgah jieš huolâttiđ tast, ete puáđuh iä moonâ paijeel ihepuáturääji. Jis tuu puáđuh maneh paijeel, te Kela piärá maasâd paijeelmere maksum uápputorjuu. Peerrâmsuumán lasettuvvoo 7,5 prooseent pajedem.
Jis tun huámmášah, ete tun finniih puáđuid eenâb ko ihepuáturääji, tun puávtáh toimâđ čuávuvávt:
- Uusâ uápputorjuu tuše uáppumánuppoojij uásán.
- Looppât uápputorjuu mottoom mánuppoojijn.
- Maaccât uápputorjuu jieijâd valjim mánuppoojijn maasâd Kelan.
Maaccât paijeelmiärálijd uápputorjuid ovdil čuávuváá ive cuáŋuimáánu loopâ.
Tun puávtáh tärhistiđ ihepuáturaajijd já rähtiđ uápputorjui kyeskee nubástusâid neetist MuuKelast.