Toorjâ škovlâmaađhijd já málásáid
Škovlâmätkitoorjâ
Škovlâmätkitorjust láá sierâ iävtuh uáppeid, kiäin lii vuoigâdvuotâ mávsuttes škovliimân, já eres uáppeid.
Škovlâmätkitoorjâ uáppei, kiäst lii vuoigâdvuotâ mávsuttes škovliimân
Tun puávtáh finniđ torjuu jieijâd škovlâmaađhij várás, jis tun čođâlditáh ovdâmerkkân
- luvâttâhuápuid tâi rävisulmui luvâttâhuápuid
- áámmátlii vuáđutotkos
- áámmáttotkos
- välmejeijee škovlim, ovdâmerkkân TUVA-škovlim
- uáppukenigâssáid čujottum rijjâ čuovviittâspargo škovlim.
Kiäst lii vuoigâdvuotâ mávsuttes škovliimân?
Tust lii vuoigâdvuotâ mávsuttes škovliimân, jis kuohtuuh čuávuvááh iävtuh olášuveh:
- Tun lah čođâldittám vuáđuškoovlâ loopân ive 2021 tâi ton maŋa.
- Tun lah šoddâm ive 2004 tâi ton maŋa.
Tun puávtáh finniđ torjuu, jis tuu škovlâmätki oovtâ kuávlun lii ucemustáá 7 kilomeetterid.
Jis tust láá ucemustáá 15 mätkipeivid kalendermánuppaajeest, te tun puávtáh finniđ olesmiärálii škovlâmätkitorjuu. Jis tust láá škovlâmääđhih 10–14 peeivi
kalendermánuppaajeest, tun puávtáh finniđ pele oles škovlâmätkitorjust.
Jis tun kiävtáh škovlâmääđhist almolii jotoluv tâi škovlâjođettem, tun jieh táválávt määvsi mađhijnâd maiden.
Škovlâmätkitoorjâ uáppei, kiäst ij lah vuoigâdvuotâ mávsuttes škovliimân
Tun puávtáh finniđ torjuu tuu škovlâmaađhij várás, jis tun čođâlditáh ovdâmerkkân
- luvâttâhuápuid
- áámmátlii vuáđutotkos
- välmejeijee škovlim, ovdâmerkkân TUVA-škovlim.
Tun puávtáh finniđ torjuu, jis tuu škovlâmätki oovtâ kuávlun lii ucemustáá 10 kilomeetterid.
Jis tust láá škovlâmääđhih ucemustáá 15 peeivi kalendermánuppaajeest, tun puávtáh finniđ oles škovlâmätkitorjuu. Jis tust láá škovlâmääđhih 10–14 peeivi
kalendermánuppaajeest, tun puávtáh finniđ pele oles škovlâmätkitorjust.
Vâi tun puávtáh finniđ olesmiärálii torjuu, iähtun lii mätkipeeivij mere lasseen tot, ete tuu määđhih mäksih paijeel 54 eurod mánuppaajeest. Talle tun máávsáh táválávt maađhijn jieš 43 eurod mánuppaajeest.
Vâi tun puávtáh finniđ pele olesmiärálii torjust, iähtun lii mätkipeeivij mere lasseen tot, ete tuu määđhih mäksih paijeel 27 eurod mánuppaajeest. Talle tun máávsáh táválávt maađhijn jieš 21,50 eurod mánuppaajeest.
Tun puávtáh finniđ škovlâmätkitorjuu, veikâ tuu määđhih mäksih ucceeb, jis tun kiävtáh maidnii čuávuváin:
- Waltti-jotolâh, mii tuáimá maaŋgâ kaavpugist
- Helsig kuávlu jotolâh HSL
- Tampere kuávlu jotolâh Nysse
- Turku kuávlu jotolâh Föli
- škovlâjođettem
- jieš uárnejum jotteemvyehi.
Tun finniih lasetiäđuid Waltti-jotoluvâst čujottâsâst waltti.fi (suomâkielân).
Škovlâjođettem uáivild tom, ete oppâlájádâs tâi kieldâ uárnee tunjin škovlâsáátu tâi uástá tunjin mätkiliipuid škovlâmääđhi várás. Tun finniih lasetiäđuid škovlâjoođeetmist oppâlájádâsâstâd.
Jis tust ij lah almolâš jotolâh tâi škovlâjođettem kevttimnáál, puávtáh jotteeđ škoovlân jieijâd valjim vuovvijn, ovdâmerkkân jieijâd autoin tâi vaanhim sáttoin.
Rekinist rekinistempalvâlusâst, ete mon ennuv tun puávtáh finniđ torjuu (suomâkielân).
Škovlâmätkitorjuu uuccâm
Uusâ škovlâmätkitorjuu neetist MuuKelast.
Meid tuu huolâtteijee puáhtá uuccâđ torjuu MuuKelast tuu peeleest.
Kela máksá torjuu tuu jotteemvyevi mield njuolgist liipu vyebdei, oppâlájádâsân tâi tunjin.
Tun koolgah uuccâđ škovlâmätkitorjuu jyehi luuhâmive sierâ.
Luuvâ lase škovlâmätkitorjuu ucâmis (suomâkielân).
Mälistoorjâ
Jis tun luuvah uápuid ollâškoovlâst, tun puávtáh finniđ vuáládâs málásijn raavâdviäsuin, moh láá mieldi mälistorjust.
Tun máávsáh málásist ucceeb, ko čááitáh uáppeekoortâ tâi Kela mälistoorjâkoortâ.