Viärjukenigâs torjuuh
Viärjukenigâsvuođâ čođâldittem uáivild suátiviehân tâi siiviilpalvâlusân moonnâm.
Tun finniih talle suátivievâst tâi siiviilpalvâlemsajestis uccâ peiviruuđâ.
Toos lasseen Kela puáhtá mäksiđ suáldáttorjuu. Tom puáhtá mäksiđ suátivievâst tâi siiviilpalvâlusâst orroi tâi suu omâháid. Omâhâš uáivild viärjukenigâs näimipelikyeimi. Omâhâš lii meid ávuskyeimi, kiäin viärjukenigâsâst lii ohtsâš pärni. Toos lasseen omâhááh láá viärjukenigâs jieijâs päärnih já näimikyeimi päärnih.
Kela puáhtá mäksiđ suáldáttorjuu meid ulmui, kii puátá olgoenâmijn Suomân palvâlusân.
Suáldáttorjui kuleh
- vuáđutoorjâ
- aassâmtoorjâ
- elettemtoorjâ
- sierânâstoorjâ.
Lasseen Kela puáhtá mäksiđ uáppuloovnâ riäntuid.
Suáldáttorjuu puáhtá finniđ
- viärjukenigâs
- pelikyeimi
- ávuskyeimi, jis kuoimijn lii ohtsâš pärni
- viärjukenigâs jieijâs pärni tâi pelikyeimi pärni.
Luuvâ lase suáldáttorjuu ucâmis (suomâkielân).
Puáđui vaikuttâs suáldáttorjui
Suáldáttorjui vaigutteh puáđuh, maid tun já tuu omâhááh finniivetteđ palvâlus ääigi. Kela váldá talle huámmášumán nettopuáđuid. Nettopuáđuh uáivildeh puáđuid, main viäruh láá maksum. Nettopuáđuh kepiduvvojeh suáldáttorjust.
Puáđoid ij kuittâg rekinistuu peiviruttâ, mon tun finniih suátivievâst tâi siiviilpalvâlussaajeest. Toos lasseen tun puávtáh tiänáđ jyehi mánuppaje 300 eurod nuuvt, ete tot ij keeppid tuu suáldáttorjuu mere. Taat kočoduvvoo syejiuássin.
Vuáđutoorjâ
Kela puáhtá mäksiđ viärjukenigâs omâhâžân vuáđutorjuu. Vuáđutoorjâ luávdá kyeimi já paarnij jyehipiäiválijd koloid, mooid eres puáđuh iä pijssáá. Toh láá ovdâmerkkân purrâmušân, pihtâsáid já tiervâsvuođâtiipšon lohtâseijee koloh.
Vuáđutorjuu oles meeri lii suulân 775 eurod mánuppaajeest. Torjuu miärán vaigutteh perruu puáđuh já paarnij meeri.
Aassâmtoorjâ
Kela puáhtá mäksiđ viärjukenigâs já suu omâháá kuáhtulijd aassâmkoloid.
Kela puáhtá mieđettiđ aassâmtorjuu viärjukenigâsân olssis tuše, jis sun lii aassâm jiečânávt 3 mánuppaje ovdil palvâlus. Jis viärjukenigâsâst lii ovdâmerkkân omâstemaassâmviste, meid ucceeb aassâmäigi pijssáá.
Aassâmkoloid rekinistojeh láigu, čäcimáávsuh, šleđgâmáávsuh, táluservimáksu, aassâmloovnâ riäntuh já peerâtáálu tipšomkoloh.
Elettemtoorjâ
Jis viärjukenigâs ij paste mäksiđ páárnán elettemiše, te Kela puáhtá mäksiđ elettemtorjuu suátivievâ tâi siiviilpalvâlus ääigi.
Sierânâstoorjâ já uáppuloovnâ riäntuh
Kela puáhtá mäksiđ viärjukenigâs omâhâžân ovdâmerkkân tiervâsvuođâtiipšon tâi pärnitiipšon lohtâseijee koloid. Taat nabdoo sierânâstoorjân.
Kela puáhtá meid mäksiđ viärjukenigâs já suu omâháá uáppuloovnâ riäntuid.
Eres torjuuh
Jis viärjukenigâs lii ejijriijâst, te sun puáhtá finniđ ejijruuđâ.
Jis tun jieh pyevti finniđ suáldáttorjuu, tust puáhtá leđe vuoigâdvuotâ finniđ almos aassâmtorjuu. Täärhist ääši Kelast.