Mäʹhtt puåtti vaaikte mätt-tuärjjõʹsse?
Tuʹst vuäǯǯa leeʹd puåtti seämmast, ǥu kaaggak mätt-tuärjjõõzz. Puåttjid lij kuuitâǥ raajj, koon kååččat eeʹǩǩpuåđraajjân. Jõs vuäǯǯak eeʹjj seʹst jäänab puåttjid, puåtti vuäiʹtte vaaikted mätt-tuärjjõõzz meärra.
Vuäitak vuäǯǯad puåttjid kuäʹss täättas kaʹlndareeʹjj ääiʹj. Mätt-tuärjjõõzz da jälstemtuärjjõõzz jeäʹt laʹsǩǩed puåttjen.
| Tuärjjõsmäänpââʹj kaʹlndareeʹjj ääiʹj | Eeʹǩǩpuåđraajj, euʹrred/kaʹlndareeʹǩǩ |
|---|---|
| 1 | 35 360 |
| 2 | 33 280 |
| 3 | 31 200 |
| 4 | 29 120 |
| 5 | 27 040 |
| 6 | 24 960 |
| 7 | 22 880 |
| 8 | 20 800 |
| 9 | 18 720 |
| 10 | 16 640 |
| 11 | 14 560 |
| 12 | 12 480 |
Jõs alttääk määttaid leʹbe valmštõõvak kõõsk eeʹjj, vuäitak vuäǯǯad rajjtõõzztaa puåttjid õuʹddel määttääd älggmõõžž da valmštõõvvâm mâŋŋa. Ǩiõčč puåđraajid kuuitâǥ mättmäänpõõʹji ääiʹj. Ââʹn huõl tõʹst, što tuʹst lie puåtti mättʼtõõttâmääiʹj jäänmõsân 1 040 euʹrred määnpââʹjest tuärjjõsmäänpââʹj õõl da 3 120 euʹrred määnpââʹjest tuärjjõõzzteʹmes määnpââʹj õõl.
Kela vuäitt raukkâd tuu seʹlvted, kuäʹss leäk vuäǯǯam puåttjääd.
Jõs jõõskak määttääd kõõsk eeʹjj, tõn mâŋŋa puåttjääd vääʹldet lokku tiudd eeʹjjest.
Looǥǥ lââʹzz, mõõk puåtti vaaikte mätt-tuärjjõssʼsad (lääddas).
Jõs puåtti mâʹnne pâʹjjel eeʹǩǩpuåđraaj
Tuʹst feʹrttai jiõčč ââʹnned huõl tõʹst, što puåtti jie mõõn pâʹjjel eeʹǩǩpuåđraaj. Jõs tõk mâʹnne pâʹjjel, Kela peʹrrai mååust leigga mahssum mätt-tuärjjõõzz. Kela lââʹzzat suʹmme, koon peʹrrjet, 7,5 proseeʹnt pââjõõzz.
Jõs vuâmmšak, što vuäǯǯak puåttjid pâʹjjel eeʹǩǩpuåđraaj, vuäitak tuejjeed nääiʹt:
- Ooʒʒ mätt-tuärjjõõzz tåʹlǩ vuässa mättʼtõõttâm-määnpõõʹjin.
- Iʹlmmet Kelaaʹje, što jiõk vääʹld mätt-tuärjjõõzz tuu vaʹlljeem määnpõõʹjin.
- Maaccât mätt-tuärjjõõzz tuu vaʹlljeem määnpõõʹjin Kelaaʹje.
Maaccât pâʹjjelmeärrsaž mätt-tuärjjõõzzid pueʹtti eeʹjj njuhččmannu loopp räjja mõõneeʹst.
Vuäitak tääʹrǩsted puåđraajad da tuejjeed mätt-tuärjjõõzz kuõskki muttsid neeʹttest MuuKelast.