Veäʹrǧǧõõlǥtõsneeʹǩǩ tuärjjõõzz
Armeija spraavmõš miârkkšââvv armeijaaʹje leʹbe siviilkääzzkõʹsse mõõnnmõõžž.
Vuäǯǯak täʹl armeijast leʹbe siviilkääzzkõsvuõttpääiʹǩest siõmmna peiʹvvtieʹǧǧ.
Tõn lââʹssen Kela vuäitt mäʹhssed sääldatveäʹǩǩvuõđ. Tõn vueiʹtet mäʹhssed armeijast leʹbe siviilkääzzkõõzzâst jooʹttja leʹbe suu roodnairuåđid. Ruått miârkkšââvv veäʹrǧǧõõlǥtõsneeʹǩǩ pieʹllkueiʹm. Ruått lij še äävkueiʹmm, ǩeäin veäʹrǧǧõõlǥtõsneeʹǩǩest lij õhttsaž päärnaž. Lââʹssen roodnairuåđ lie veäʹrǧǧõõlǥtõsneeʹǩǩ jii´jjes päärna da pieʹllkueiʹm päärna.
Kela vuäitt mäʹhssed sääldatveäʹǩǩvuõđ še ooumže, kååʹtt puätt ålggjânnmin Lääʹddjânnma kääzzkõʹsse.
Sääldatveäʹǩǩvuõʹtte koʹlle
- vuâđđveäʹǩǩvuõtt
- jälstemveäʹǩǩvuõtt
- jeäʹltemveäʹǩǩvuõtt
- spesiaalveäʹǩǩvuõtt.
Lââʹssen Kela vuäitt mäʹhssed mättlääin koorǥid.
Sääldatveäʹǩǩvuõđ vueiʹtte vuäǯǯad
- veäʹrǧǧõõlǥtõsneǩ
- pieʹllkueiʹmm
- äävkueiʹmm, jõs kuõiʹmin lij õhttsaž päärnaž
- veäʹrǧǧõõlǥtõsneeʹǩǩ jiiʹjjes päärnaž leʹbe pieʹllkueiʹm päärnaž.
Looǥǥ lââʹzz sääldatveäʹǩǩvuõđ ooccmest (lääddas).
Puåttji vaaiktõs sääldat teäʹǧǧveäkka
Sääldat-teäʹǧǧveäkka vaaikteei puåtti, koid ton da roodnairuåđad vuäǯǯveʹted kääzzkõõzz poodd. Kela väldd lokku täʹl nettpuåttjid. Nettpuåttjin juuʹrdet puåttjid, koin lie mahssum piiđ. Nettpuåtti ǩieʹppeet sääldat-teäʹǧǧvieʹǩǩest. Puåttjid jeäʹt kuuitâǥ laʹsǩǩe peiʹvvtieʹǧǧ, koon vuäǯǯak armeijast leʹbe siviilkääzzkõsvuõttpääiʹǩest.
Lââʹssen vuäitak teäʹnʼjed juõʹǩǩ määnpââʹj 300 euʹrred krååʹma, što tõt uuʹccad sääldat-teäʹǧǧvieʹǩǩ meäʹr. Tän kååččat suõjjvueʹzzen.
Vuâđđveäʹǩǩvuõtt
Kela vuäitt mäʹhssed veäʹrǧǧõõlǥtõsneeʹǩǩ roodnairueʹtte vuâđđveäʹǩǩvuõđ. Vuâđđveäʹǩǩvuõtt kätt kueiʹm da päärnai juõʹǩǩpeivvsaž koolaid, koid jeeʹres puåtti jie riʹjtte. Tõk lie ouddmiârkkân porrmõʹšše, pihttsid da tiõrvâsvuõtthåiddma kuulli kool.
Vuâđđveäʹǩǩvuõđ tiudd mieʹrr lij nuʹt 733 euʹrred määnpââʹjest. Veäʹǩǩvuõđ meärra vaaikte piârri puåtti da päärnai mieʹrr.
Jälstemveäʹǩǩvuõtt
Kela vuäitt mäʹhssed veäʹrǧǧõõlǥtõsneeʹǩǩ da suu roodnairuåđ toolkvaž jälstemkoolaid.
Kela vuäitt miõttâd jälstemveäʹǩǩvuõđ veäʹrǧǧõõlǥtõsnekka jiõccses tåʹlǩ, jõs son lij jälstam jiõččines 3 määnpââʹj ääiʹj õuʹddel kääzzkõõzz. Jõs veäʹrǧǧõõlǥtõsneeʹǩǩest lij ouddmiârkkân vuäʹmstemaazzâlm, vuäʹnkab jälstemäiʹǧǧ še riʹjttai.
Jälstemkoolaid laʹsǩǩeet vuåkr, čääʹccmääusaid, liâdggmääusaid, aazzâlmvaʹsttõõǥǥ, aazzâlmlääin koorǥid di piârripõõrt håiddamkoolaid.
Jeäʹltemveäʹǩǩvuõtt
Jõs veäʹrǧǧõõlǥtõsneǩ ij pââʹst mäʹhssed päärnže jeäʹltemveäʹǩǩtõõzz, Kela vuäitt mäʹhssed jeäʹltemveäʹǩǩvuõđ armeija leʹbe siviilkääzzkõõzz ääiʹj.
Spesiaalveäʹǩǩvuõtt da mättlääin koorǥ
Kela vuäitt mäʹhssed veäʹǧǧõõlǥtõsneeʹǩǩ roodnairueʹtte ouddmiârkkân tiõrvâsvuõtthåiddma leʹbe päärnaihåiddma õhttneei koolaid. Tän kååččat spesiaalveäʹǩǩvuõttân.
Kela vuäitt mäʹhssed še veäʹrǧǧõõlǥtõsneeʹǩǩ da suu roodnairuåđ mättlääin koorǥid.
Jeeʹres veäʹǩǩvuõđ
Jõs veäʹrǧǧõõlǥtõsneǩ lij eʹččluõvâsvuõđâst, son vuäitt vuäǯǯad puärrsipeiʹvvtieʹǧǧid.
Jõs jiõk vueiʹt vuäǯǯad sääldatveäʹǩǩvuõđ, tuʹst vuäitt leeʹd vuõiggâdvuõtt vuäǯǯad takai jälstemtuärjjõõzz. Tääʹrǩest ääʹšš Kelast.